搞電商

今個星期好多人都忙於政府嘅《遙距營商計劃》,就算唔係入咗個供應商名單都好多人問,而當中有一項嘅就係建立網店!當然香港最為人熟悉嘅就一定係 Shopline 同掌舖,而海外嘅通常會諗起 Shopify。至於自己起網店就當然離唔開 WooCommerce 啦。Facebook 亦都剛剛發佈佢哋嘅 Facebook Shop,將網店同社交平台結合。至於功能嘅細節依然有待研究,因為目前只開放俾美國用戶。

撐港台

政府近日接二連三咁打壓香港電台!除咗早前收回教育電視大樓之外,早前因為港台節目《頭條新聞》播出諷刺警方執法嘅內容而屢遭投訴,通訊事務管理局亦都因此作出調查。2 月14 日播出嘅《頭條新聞》收到超過 3300 個嘅投訴,而今日通訊局經過調查後,認為《頭條新聞》污衊同侮辱警方,資料不準確,未能係個人意見節目中表達多方面意見,裁定投訴成立。所以向港台發出警告,敦促要嚴格遵守《電視節目守則》。

考評局

真係估佢唔到,因為一條文憑試嘅問題,竟然掀起一場風波。所有歷史係有值得探討嘅原因!當然歷史係無辦法改變,亦無爭議嘅餘地。只不過題目係考學生嘅理解同辯論能力,咁點解問是否同意「1900-45年間,日本為中國帶來的利多於弊」會有問題?點解教育局局長楊潤雄要要求考評局取消該試題?相信無人會唔知第二次世界大戰日本對亞洲各國所帶嚟嘅影響,只不過係問「是否同意」,咁有乜嘢問題?

被革職

相信打工仔最唔想嘅就係俾人革職,當然有時係因為工作表現,有時因為公司業務,所以俾人炒魷魚。當然好多人都希望公司請佢食肥雞餐啦,只不過始終被人革職點都會唔開心,尤其係大環境唔好嘅情況之下,要幾耐先搵到份新工都係未知之數。就算俾你搵到,環境唔同咗,分分鐘收入都少咗,感覺係有啲徬徨。當然有時在商言商,係無辦法之下都要作出減省人手嘅決定。

監警會

其實監警會做啲乜?佢實質有啲乜嘢嘅用途?做完份報告真係可以平息香港市民對警隊嘅質疑?一份審視有16章過千頁嘅報告,究竟講啲乜嘢?基本上全部都係廢話,完全唔覺得中立,而且就算知道問題有點?到最後都只係一份報告!就好似報告中提及上年7月21日元朗站事件,「警方多次錯失情報及澄清機會,引發警黑勾結的指控,但強調警司與白衣人交談及輕拍肩膊,具有充分理由。」失情報及澄清機會?警司與白衣人交談有充分理由?