移民潮

香港係八九十年代曾經出現過移民潮,由其經歷咗天安門事件之後,更加多人對回歸後嘅香港擔心。擔心嘅都係自己下一代嘅將來!要去到一個新嘅環境,要適應新嘅生活真係談何容易。當然現今世代好多人都係外國讀書同長大,加上外出旅行比起以前更加容易。所以大家都知道乜嘢地方會適合自己,雖然去旅行同長期居住係嗰個地方好唔同,不過最起碼去過,了解過當地嘅風土人情先啦!

兩年後

我其實已經唔記得咗兩年前我寫過啲乜,而慶幸嘅係我因為嚟個網誌以記錄咗一段香港人嘅歷史。除此之外,竟然因為自己發起嘅活動而收集咗超過一百篇嘅個人感受。唔知大家睇返嘅時候會唔會同而家嘅諗法有所不同?兩年時間話長唔長,話短唔短,好多嘢都變咗,不過嚟段歷史係唔會改變。一個政府用咗四年去分裂香港人,如果再俾多四年佢,香港會變成點真係無法想像!

去投票

作為一個香港人,只要你年滿十八歲就有資格去登記做選民去投票。雖然香港唔似一啲國家,規定你一定要去投票,因為嚟個係一個公民責任,如果唔投票就會俾人罰款。而係香港當然係自願性質,所以個話事權係每個香港人身上。當大家覺得而家嘅制度有問題嘅時候,一個普通市民可以做嘅就係希望通過選舉,自己嘅一張選票去改變個社會。或者到最後未必可以改變到,但係最少唔可以放棄發聲嘅權利!

被起訴

依家香港真係越嚟越離譜,講乜嘢法治社會,其實又係唔係虛有其表?雨傘運動已經過去咗一整年,而家咁去告人算唔算係秋後算賬呢?仲有我真係唔明乜嘢叫做預約拘捕?如果有人犯咗法,執法部門係要去拘捕違法者,而如果違法者犯咗法,自己去舉報自己,嚟個行為叫做自首。我真係唔知係唔係得香港有嚟樣咁特別嘅方法去預約嗰啲所謂犯咗法嘅人去警局俾人拘捕。

雨過後

今日係雨傘運動嘅一週年,相信好多人都唔會忘記嚟一日。對於香港嚟講,係一個歷史嘅日子。其實到咗呢刻我都唔係太相信香港政府竟然係一年前出動防暴警察去驅趕手無寸鐵嘅市民。而經過咗七十九日嘅雨傘運動,香港人最後得到啲乜?其實係政制上冇乜大嘅改變,就算最後政改因為建制派嘅蝦碌事件導致無法通過,好多香港人其實仲未醒覺。當然會唔會再有同樣嘅抗爭?我諗好難再有咁嘅機會。