「真相」 經過咗咁多個月，終於有人夠膽出嚟講返個真相出嚟！重點係我哋係一個言論自由嘅城市，竟然連講返個真相出嚟都要思前想後，擔驚受怕。咁香港真係一個自由嘅社會嗎？口口聲聲話一國兩制，嚴正遵守基本法，高度自治，等等嘅漂亮說話，其實到最後所謂嘅五十年不變就因為今次嘅失蹤事件不攻而破。而今次嘅事件再一次嚴重打擊香港人對中國政府嘅信任！

真係估方丈唔到，竟然無啦啦又再嘗試平息銅鑼灣書局失蹤事件。今次竟然係話桂敏海係好多年前因為揸車撞死咗個女大學生。而佢因為怕要坐監，所以畏罪潛逃，但係又無啦啦話自己負罪感同愧疚感與日俱增，所以自願返中國自首。最神奇嘅係件事係透過央視嘅獨家專訪播出桂敏海嘅訪問，而佢係訪問入面不斷話事件被炒作，話係個人自願嘅選擇，與任何人無關。真係有無人信呀。。。

一個立法會議員嘅言論可以有幾膚淺？你睇吓「吳亮星」就知啦，真係一個完美示範！佢每次所講所做嘅嘢都只會令你爆粗。由新界東北撥款，鉛水延年益壽論，五位失蹤人士偷渡返大陸去嫖妓。嚟啲咁嘅處事手法同言論係一個立法會議員應有嘅質素嗎？當然係立法會入面仲有好幾個議員都不時發表佢哋嘅偉論，只不過吳亮星真係膚淺到無人有，竟然將一啲未經證實嘅傳言當成事實。

其實真係幾得意，而我亦留意咗好耐。每次香港有啲大事發生，我哋個位特首都會先摺埋幾日，然之後突然就會出嚟見記者。通常都係用一個非常之官方嘅態度去解釋已經發生咗幾日嘅事件。最特別之處係每次佢講完嘢嘅一兩日都會有突破性發展。講真有無咁啱得咁橋呀？次次都係咁？今次失蹤嘅案件又係咁，佢出嚟講完嘢之後就收出現咗一封平安信，兼且去撤銷案件？真係咁橋？唔會啩。。。

講真邊個會相信香港回歸之後會五十年不變？如果相信嘅話，一係佢哋就係親中派，一係佢哋就係嗰班「港豬」？香港慢慢已經變成好多人唔認識嘅地方，因為慢慢我哋失去咗香港嘅核心價值！自由其實係得來不易，只不過要失去亦都好容易。你以為好多未必可能係香港發生嘅事同物，分分鐘都會發生。因為我哋已經再唔係生活係我哋長大嘅地方「香港」，而係慢慢被一個獨裁而無自由嘅政府侵蝕。