第十八

邊個話女仔易湊啲㗎?不過女仔就真係有啲脾氣,有時真係唔知道佢扭啲乜嘢。當然依家識行識走,同隻甩繩馬騮無分別。本來以為女仔會定啲,安靜啲,但係真係比起郭大少更加嚴重,真係以為生多咗個仔。話雖如此,佢又唔係嗰啲唔怕陌生人嗰啲,見到唔識嘅都需要啲時間去適應。希望之後返學會好啲,相信唔會好似郭大少咁一支箭咁衝咗入去連回頭望都唔望。

第十七

唔覺唔覺又一個月,本來今日應該寫其他嘢先,但係點都係記錄郭小姐嘅成長緊要啲。當然相比起郭大少,佢冇乜話點樣出去上堂,大部份時間都係同我哋一齊,但係睇得出有個頑皮嘅哥哥,好多嘢都係跟著佢做。正所謂好嘅唔學,學晒郭大少啲曳嘢!當然有時真係俾佢哋激死,因為細妹學阿哥,但係阿哥見到個妹做就話佢曳,無限輪迴。其實邊個先至最曳呢?真係大嘅唔好教壞細!

第十六

因為疫情其本上都係屋企,而郭大小姐嘅脾氣真係大到一個點,對比郭大少嘅真係差天共地。貼身指數簡直超越一隻樹熊!不過女仔同男仔真係分別好大,依然經常去鞋櫃拎對鞋出嚟想去街。不過亦都因為有個頑皮嘅阿哥,所以亦都有啲男仔頭。佢簡直就係超越郭大少,因為無嘢怕,不斷爬上爬落,週圍搵嘢搞,真係破壞力驚人。基本上真係一個名副其實嘅港女!

第十五

當然係疫情之下好少出街,不過相比起之前有工人嘅時候,郭小姐基本上都要同我哋一齊。分別其實都真係幾大,最起碼依家無咁怕陌生人,成日想出街。依家仲自己走去鞋櫃到拎對鞋仔想自己著,真係服咗佢,完全睇得出佢大咗會係一個街精。當然無嘢安慰過佢係一個好食得嘅小朋友,依家成日想食我哋啲嘢,唔比佢真係會鬧鬼你。當然食得是福,只係有啲嘢佢真係未食得!