五十九

我諗今個月最開心嘅就係迪士尼開返!因為又可以唔駛諗同佢去邊放電。當然依家要預早七日訂位,不過好彩係佢開返嘅第一個星期六已經可以去到。真係整整五個月無去過,而感覺好似第一次去咁見到啲新嘢都會話嚟啲之前無㗎喎!除此之外,今個月真係唔記得去咗幾多次海灘,真係一好天同有時間都會去,因為真係唔知同佢可以做乜。之前諗住佢大個咗可以試過去行街,但係到最後都係搵自己嚟搞。有話攰,又話悶,真係激死!

五十八

究竟今年郭大少返咗幾多個月學?我諗都真係一隻手數得晒!對於小朋友嚟講,返學應該係最開心嘅時間,亦都係最寶貴嘅時間。啱啱開學,雖然叫做識咗啲同學仔,只不過斷斷續續咁返下停下,然後直頭整個學期都無得返學見啲朋友。雖然話透過網上可以學習,但係我始終覺得小朋友係需要有社交接觸。當然無人諗過疫情會持續咁耐,而亦都係咁整個幼稚園學年就咁無咗。

五十七

唔知係唔係因為疫情嘅關係,今個月覺得過得好快。好似啱啱寫完郭大少上個月嘅嘢,而家又剛剛一個月。每日依然宅係屋企,唔知今年仲有冇機會返學。學校只係有三日每次大約三十分鐘嘅網上課程,其他都係網上短片同每個星期去學校拎功課。當然進度一定同返學無得比,而最緊要當然係唔好影響到小一面試啦。今個月亦都去咗影學生相,小朋友真係大得好快,過多三個月就五歲了!

五十六

無問過時間真係會快到咁,因為過咗唔知邊個歲數,我哋再無同郭大少慶祝二十七號。而家大多數都係幫妹妹慶祝,所以今日想佢開心吓就買咗個蛋糕俾佢。不過因為疫情,已經有好長時間無返學,真係足足兩個幾月。復課無期,一個星期得兩堂網上課程,所有其他嘅活動都取消晒。其實最擔心嘅都係今年開始考小學,而無學返真係好驚影響到佢嘅學習。今年餘下嘅學期都真係凍過水!

三歲了

眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友!