十年的

十年前決定放棄高薪厚職,開始籌備自己公司,用六個月一邊返工一邊準備,希望用十年做自己想做嘅嘢。十年後嘅今日,覺得十年原來比想像中快,快到自己都唔知做咗啲乜,甚至乎覺得比起十年前更加倒退。近嚟五年嘅轉變就更加大,尤其係郭大少出世之後。如果再比我揀過會唔會揀同一條路?十年期限到了,下一步究竟係點?其實近年嘅問題不斷重複,真係有啲攰。放棄,堅持依然係一大個問號。

唔捨得

曾幾何時雖然自己親手將擁有過嘅嘢拋諸腦後,但係仲記得由一個設計下網頁嘅細路到十年前開始管理一個團隊嘅管理層。一手將十三個人嘅團隊係四年之間擴展到二百幾人,講真好多時都唔使落手落腳做,大部份嘅時間都係開會同管理自己嘅團隊。以前因為打工,飛機同酒店變咗第二個屋企,去其他國家基本上公司俾錢,食好住好。有時其實唔敢相信六年時間過去,因為自己孤軍作戰,仲未返到家鄉!

回到邊

唔知依家有幾多小朋友有睇過「回到未來」嚟套電影,一套超級經典嘅作品。而今日就正正係套戲嘅第二部曲講述主角利用時光機穿越時空嚟到二零一五年。係戲入面講述好多以前嘅人對未來嘅科技嘅睇法,而睇返嚟啲科技,有好多科技係現實生活中已經出現咗。雖然有啲科技仲未好似戲入面咁普及,但係亦有不少你睇返係二十幾年前大家諗都冇諗過嘅科技,竟然係二十幾年後面世。