自己救

好多人都會為生活而擔憂,因為今次疫情嘅影響比起過往咁多次嘅逆境更加嚴重。好多人都開始變陣,因為如果再唔諗辦法嘅話,真係唔知可以捱到幾耐。其實好多嘢都係要迫出嚟,唔試過又點知呢?真係乜嘢都要試,乜嘢都要做,唔好淨係企係度。咁嘅情況下真係要搵多啲人傾計,話唔定有啲新嘢創造到出嚟!

跌停市

今次嘅武漢肺炎已經唔再只係影響亞洲市場,而今次嘅影響應該只係啱啱開始。就算個股市已經連日大跌,但係只係將之前嘅泡沫蒸發緊,而實質上都未真係入到肉。當然跌到幾時真係無人知,但係一定未見底。依家只可以做嘅就係準備最差嘅情況,而且準備好當個市場開始會覆正常嘅時候再重新出發。人生真係可以遇到幾多次逆境?過去二十年都已經係第三次了!

下一步

下一步大家會做啲乜?當然坐係度乜都唔做,淨係希望個市會好返,其實真係同等死無分別。就算疫情有所紓緩,但係可唔可以回覆返幾年前咁,其實都真係一件好難嘅事。上年年底已經諗住過完年重新佈陣,事前都已經準備同安排咗好多嘢,但係依家就算傾緊嘅項目同工作都無辦法繼續。雖然唔係第一次打逆境,但係環境唔同咗,今次難度亦都比較大。唔死就已經贏咗!

一七年


個人分享
Tagged With: , , , , , , , , ,

二零一七應該係我人生入面最差嘅一年!由頭到尾其實都唔知今年做咗啲乜,只係知道每一日都有唔同嘅問題要處理!真係可以話十個煲得一個蓋去形容。本來以為年尾可以好過返少少,點知到最後仍然仲未有啲乜嘢突破!雖然每日都希望用一個正面嘅心態去看待困難同逆境,但係每日得到嘅係無數嘅批評同責備。雖然嚟到今年嘅最後一日,情況依然未有改善,只係希望新嘅一年做返自己!

雪中炭

每個人一生都會遇到唔同嘅困境,但係當你有事嘅時候邊個會嚟幫你?當然無人有責任一定要幫你,好多時都會好客氣咁同你講幫唔到你。有時要開聲去搵人幫手唔係一件易事,人哋幫唔幫你係佢哋嘅個人選擇。但當有朋友會出手相救嘅時候你就會覺得佢哋雪中送炭,求你一命。嚟啲朋友真係兩脇插刀,真係多謝佢哋係無助嘅時候出手扶你一把。除咗感激之外真係唔知講乜嘢好。