破產潮

究竟武漢肺炎嘅影響有幾嚴重?同我之前所講,最起碼航空,酒店同旅行社都受到最大嘅衝擊。究竟有幾多公司可以捱得過疫情嘅影響,相信慢慢會浮現。只係遲早嘅事,因為影響只係啱啱開始,而真係言之尚早。無人知幾時先至會回覆正常,最起碼今年都應該唔會。所以有幾多公司可以捱足一整年?講真應該唔會太多!而破產潮應該好快出現,好多行業都應該會大洗牌!

再出發

香港再出發?出發去邊?其實真係要幾咁老土嘅人先至會諗啲咁老土嘅嘢?我諗都係得啲無聊人先至會做!如果你問香港人想出發去邊,我諗而家好多香港人最想嘅就當然係出發去旅行啦!好老實講其實要轉型,要再出發嘅人都已經出發左!我諗只有固步自封同依賴傳統經濟嘅人先至仲未諗到點出發!要重新開始嘅人係唔會因為逆境而停步,反而係加快咗佢哋嘅腳步!

被轉型

網上因為武漢肺炎大家除咗被創業之外,當然就係被轉型。當然有一部份嘅人因為今次嘅疫情導致無收入,失去工作。係咁嘅市況之下,要搵工都唔係一件易嘅事。當然有啲公司係逆市請人,因為好多人才流入市場,係一個唔錯嘅時機請人。但係亦都有一部份嘅人就要急急轉型,因為就算疫情過去之後都未必有嘢做。有危便有機,好多人只係過唔到自己嘅安全網而已。

一環扣

今次嘅肺炎對於好過行業都有重大影響!除咗好多工作都係一環扣一環,而首當其衝嘅一定係航空業,酒店業,旅遊業同零售業。因為各國都封關,基本上所有嘅人都唔會去到旅行,而商業活動亦都只可以透過網上舉行,所以航空公司都真係無辦法,只可以停飛。無人去其他地方,咁當然就無人需要住酒店啦,入住率超低。至於旅遊業就更加唔洗諗,無遊客就等於無收入。而零售業就更加唔駛多講,尤其做旅客生意嘅都相信唔捱到幾耐。

逼出嚟

對於好多人嚟講,以前係屋企工作可能係一大挑戰,而好多公司都或者未試過咁大規模咁要員工係屋企工作。過去兩個月好多人都應該已經慢慢習慣,係屋企做嘢唔代表量地,亦都唔係冇嘢做,相信好多家長而家先至會明。而對於我嚟講,其實係無分別因為早就已經習慣嚟個模式。好多嘢都係迫出嚟,如果無今次嘅疫情,相信好多嘢都只係原地踏步。所以我經常講任何時候都要處於危機狀態,咁先至會有突破,唔好諗住樣樣嘢都順風順水。