靠團隊

「運動」

大部份嘅團隊運動都係要靠一個團隊嘅合作性先至會發揮到最佳嘅效果!藍球係咁,足球亦都係咁。正所謂波係圓嘅,未到最後一分鐘,其實都仲未可以分得到勝負。就以今年嘅歐洲國家盃為例,真係有好多驚喜。今屆嘅比賽亦都證明咗就算身價幾高嘅球員,技術有幾高超都好,如果只係靠一己之力其實係唔會走得遠。所以信任自己嘅隊友係好緊要!

港隊勁

「大戰」

無論你係唔係熱愛足球,甚至乎你對足球毫無興趣,但係只要你係香港人嘅話,相信你琴晚都會支持香港足球隊。雖然再一次面對中國國家隊,係世界排名同實力上好似有啲距離,賽前更有好多人覺得香港隊會輸。但係經過上輪嘅比賽,其實已經經證明咗香港隊係有一定嘅實力。而且今次返到嚟香港主場,當然氣勢就更加唔同啦。雖然係世界盃外圍賽,但係大家都希望香港可以有機會出線!

曾俊華

好老實講,曾俊華做財政司做得好唔好,或者見仁見智。我個人認為真係好一般啦,因為大家對佢每年嘅財政預算案都係冇乜期望,但係好多時唔知點解覺得佢講嘢同我哋所謂嘅特首時不時都有所偏差。當然嚟樣嘢就得佢自己先知,不過有時就見到佢講啲嘢同做啲嘢都似返一個香港人,最起碼唔似我哋個特首咁。不過某啲言論就真係會令人憤怒嘅,就正如佢話自己係中產咁。

港足球

我諗好多係香港長大嘅男仔都會鍾意踢波,而我其實細個都好鍾意,不過我自己就真係好少睇波,除咗世界盃之外。至於邊個位置我最鍾意?當然係門將啦,或者係因為「足球小將」入面「三杉淳」嘅原因,我鍾意守龍門多過做前鋒。不過人大咗,唔記得邊個話踢波唔會高之後,所以係中學時期就越嚟越少接觸足球。不過見到香港近年係足球賽事有所進步,希望真係有機會去打世界盃啦!