二三四

二十出頭,唔係讀緊書就應該係做緊嘢。大部份嘅人都應該雄心壯志,個個胸懷大志要闖一番事業。而其實係十年之間要把握青春,去多啲地方睇多啲,見識多啲。唔好做隻井底之娃。有青春,有魄力,應該唔好計較咁多。反而係要用自己最大嘅資產,年齡!因為負擔少,顧慮少,就應該豁出去,爭取任何嘅機會,攞唔同嘅經驗。咁先至可以為三十歲打好基礎。

數據戰

每間公司最值錢嘅資產其實係數據,所以大家都希望建立自己嘅數據平台,但係如果只有自己公司嘅數據,好多時就無辦法突破框架。因此好多時唔同公司都會將某部份嘅數據互相分享同連結起嚟,希望係分析數據嘅時候可以更加全面。收集數據只係一個開始,因為無數據同方程式就無可能自動化,而無自動化就無得令程式自學起嚟,而無自學嘅話就唔會有人工智能!

好無良

唔知點解香港有啲公司話幫人註冊域名,搞網站,買廣告,但係佢哋堅持用佢哋自己公司嘅帳號幫人註冊同買不同嘅服務。唔通咁樣就可以威脅佢哋嘅客戶,以為咁就可以綁死啲客?唔好咁天真啦好唔好?如果真係做得好,其實點解要用咁嘅技倆。人哋都係唔識先至搵你做啫,但係都唔好咁無良,就算有日真係唔搵你哋做,至少都比返晒啲嘢人呀。就係因為咁,好多人都對我哋嘅行業無晒信心!

好員工

我經常講一間公司嘅成功與否,其實唔係淨係老闆一個嘅功勞。因為到最後落手落腳做嘢嘅人,好多時都嚟一班為你勞心勞力嘅員工。好彩嘅佢哋真係可以話幫你賣命,甚至乎可以講生係公司嘅人,死係公司嘅鬼。如果你慶幸公司有啲咁嘅員工,你都可以話三生有幸!當然唔係話老闆嘅個人能力唔重要,只不過要運作一間公司唔係淨係靠老闆一個。當然一個好老闆身邊通常都有好嘅員工!

定目標

近排越嚟越多人會慢慢開始利用數據去訂立商業目標。但係往往所謂嘅目標就冇一個明確嘅計算方法,甚至用錯數據去量度目標。好多時要理解數據係點樣產生,同時點樣翻譯數據給你嘅訊息。而要善用數據,首先要知道佢點樣可以解決商業問題。一般數據係會分為兩種,一種基本上係無用嘅事實,只會反映現狀,另一種就係深層數據,嚟種數據先知係有用嘅數據。