工作坊

個個因為疫情係屋企返工返學,而網上會議,直播,工作坊就當然多到數唔晒。當然係咁嘅情況下,最大嘅挑戰其實係網絡嘅負荷。個個都用高清串流,網絡速度同流量嘅需求十分之大。係香港好彩我哋有光纖寬頻,但係如果你係外國嘅話就大獲,因為好多時網絡供應商都有流量限制。另外網絡速度每個國家都唔同,以致費用亦都唔平,所以係唔係個個都可以無顧慮咁開會同睇直播。

上網學

上網學嘢當然唔係今時今日先流行,其實咁多年嚟我所學嘅嘢大部份都係網上面學。以前網站同教學都係文字為主,而家就文字加短片。睇完教材自己埋頭苦幹咁不斷試,試到得為止。最緊要嘅係唔怕失敗,不過當然亦有時候遇到樽頸位,但係亦都可以上網去請教其他人,因為世界這麼大,一定有人幫到你!而近期就唔使講,個個都上網開直播,整教學,真係唔怕宅係屋企無嘢做!

都幾難


個人分享
Tagged With: , , , , , , , , ,

有時當自己以為簡單嘅嘢其實原來再講返一次出嚟同教一啲毫無背景嘅人都真係難。好多時自己會無留意到一啲以為理所當然嘅嘢,實則上對好多人嚟講係一頭霧水。所以做嚟類型嘅課程真係要將佢分成兩類,一類係對技術有認識嘅,一類係一竅不通嘅。如果唔係俾錢上堂,但係一啲嘢都學唔到。要有效咁將自己嘅知識轉化成有效嘅課程真係唔係一件易嘅事。要不斷改進先至可以達致最大效益!

做直播

都係怪自己之前幾年無好好咁花時間係培訓課上面,依家唯有臨急抱佛腳去準備網上教學。一直希望先將平台整好,亦都因為係想專業啲嘅關係,希望真係用上堂嘅方式去提供教學。不過自從上年九月開始,其實真係比較難開辦課程,所以一直都有諗過係唔係改做網上教學會好啲。當然整個課程要重新編排,因為要將原本三個鐘嘅課程縮短至最多四十五分鐘。

速成班

過去幾個月都係比較專注係開班教分析數據嘅業務,當然係因為之前有好多人都問我邊度有堂上。雖然已經行咗一排,不過係唔同嘅地方都見到有其他公司都有開唔同類型嘅課程,有時亦都會諗大家嘅定位有啲乜嘢唔同。我相信最大嘅分別係宣傳手法同課程嘅價錢定位,而好多時見到佢哋最常用嘅字就係速成!咁明白嘅,因為香港人忙所以樣樣嘢就當然希望學完就用得,只係現實同希望係兩回事!