港產片

老實講真係好耐無睇港產片,最近最想睇嘅應該係「一念無明」。不過除此之外,今年被提名嘅電影真係有好多都聽都未聽過!或者近年真係睇少咗戲,所以真係無乜留意究竟有啲乜嘢嘅港產片。另外其實都有小小怕睇嗰啲合拍嘅電影,因為套戲有非本地嘅演員,啲對白好多時都要搵配音將佢變返做廣東話。其實感覺真係好怪,所以如果唔係啲超級好評嘅電影都好少會入場睇。

舞台劇

唔知道大家有無睇過舞台劇,其實係香港做舞台劇係一件幾艱難嘅事,不過睇舞台劇唔同睇電影或者電視劇。所有嘢都好靠演員嘅感染力同穿透力,去令每位觀眾感受到每個情節。當然每一場都係嚟真嘅,唔似電影或者電視劇咁可以有蝦碌嘅場面出現。所以每一位台前幕後嘅工作人員都唔可以出錯,所以舞台劇嘅觀賞性係特別高,因為係演戲最原始嘅舞台!

搞內容

好多時我哋都會話內容係非常緊要,而要有好嘅內容就要先由文字入手。依家寫文真係唔容易,因為唔係好似以前個個會攞起本書慢慢睇,好多時要精簡同要有話題性。另外要考慮啲內容嘅用途同發佈嘅渠道,事關唔同嘅渠道有不同嘅讀者。至於係唔同嘅網上平台亦有唔同嘅規限,所以有時真係要好有創意,不過都咪話唔辛苦,事關真係好容易會詞窮!

我是乜

「歌手」

嚟幾日「我是歌手」第三季又變成熱話,原因係「陳潔儀」俾人叮走咗。就連鄭中基同何韻詩都發表咗佢哋嘅睇法。雖然我無睇過第一集,但係第二集因為一個鄧紫棋,就變咗一個全城焦點。講真個個上得去都係歌手,仲要個個有名。咁點解要將自己嘅名望攞去賭一鋪呢?有啲我明,有啲就真係唔知點解要參賽。相信唔係因為錢就係名氣。

港電視

「維基」

晚晚返到屋企都會開電視,但係晚晚都鬧好悶無嘢睇。㩒嚟㩒去,㩒嚟㩒去,火都嚟!Download 完啲外國節目,話咁快就睇晒啦,真係一台獨大,仲衰過係內地。所以之前好期待「王維基」嘅「香港電視」,但係又俾啲歪理唔俾牌佢,仲不斷打壓話嚟樣唔得個樣唔得。真係官字兩個口。