失自由

香港係唔係開始步入「一國一制」嘅年代?所謂嘅五十年不變嘅承諾,而家連一半都未過就已經蕩然無存?因為過去近一年嘅社會風波,因為一個無能嘅特首,搞到依家要中國出手,老實講問題源頭都係因為林鄭!真係多得佢唔少,佢嘅破壞力真係勁過梁振英!香港都真係多得佢唔少,因為而家變咗做夾心餅,淪為世界嘅政治籌碼,何必呢?

寫唔寫

如果有睇到今日特首點樣回應《國安法》嘅話,其實應該都預咗佢會講乜嘢廢話。基本上《基本法》附件三係一個後門,任何時候其實都可以隨時將中國法律加入附件三。咁當然《國安法》所涵蓋嘅範圍實在太廣同太闊,咁究竟自己仲寫唔寫有關自己嘅睇法同政治相關嘅嘢好呢?當然出得文或多或少都會預咗,只不過今次咁強硬,可見佢哋淨係擔心社會運動繼續落去嘅話係會出事。

國安法

因為上年反修例而引起嘅社會風波,直到今日依然未平息。接二連三政府不斷打壓,亦都未有回應市民嘅訴求。與此同時香港回歸咁耐依然未為《基本法》23條立法,但係即將開幕嘅中國全國人民代表大會將審議有關香港「維護國家安全」的議案。據媒體報道,今次加入嘅《國安法》將包括顛覆國家政權,分裂國家,恐怖活動,以及外部勢力干預。

撐港台

政府近日接二連三咁打壓香港電台!除咗早前收回教育電視大樓之外,早前因為港台節目《頭條新聞》播出諷刺警方執法嘅內容而屢遭投訴,通訊事務管理局亦都因此作出調查。2 月14 日播出嘅《頭條新聞》收到超過 3300 個嘅投訴,而今日通訊局經過調查後,認為《頭條新聞》污衊同侮辱警方,資料不準確,未能係個人意見節目中表達多方面意見,裁定投訴成立。所以向港台發出警告,敦促要嚴格遵守《電視節目守則》。

忘不了

究竟有幾多年輕人會去悼念六四?佢哋就算去嘅話,其實係唔係為咗趁熱鬧?定係因為朋友或者屋企人話去所以就去?無論係點,新世代應該需要完全了解當年所發生嘅每一件事!用武力去鎮壓手無寸鐵嘅學生,其實同大屠殺係無分別,與此同時大家亦都應該去了解事件嘅始末。其實用乜嘢形式去將六四嘅歷史保存同傳承係一個好重要嘅議題,因為大家唔希望嚟段歷史慢慢咁俾人忘記!