關鍵字

每個人每日最少都會用谷歌一次,而你記唔記得你自己曾經搵個乜嘢嘅資料,輸入個啲乜嘢關鍵字?谷歌其實就好似一間讀書館咁樣,佢將所有網上面嘅所有資料都收集係自己嘅數據庫入面,再通過唔同嘅方法去分門別類。而每年谷歌都會發佈當年最多人搜尋嘅關鍵字係啲乜嘢!好多人話香港人越嚟越少睇電視,雖然無實質嘅數據但係最起碼二零一七年最多人搜尋嘅關鍵字係同電視劇有關!

包生仔

其實好多時有啲客都會問我如果搵我做數據分析,可唔可以保證做完有成績睇!通常我都會話無可能,因為每間公司嘅環境唔同,客戶群唔同,策略唔同,產品同服務都唔同!所以我係無可能包生仔,我只可以話俾佢哋知我哋常見嘅問題,一般嘅處理方法,同過往做嘅分析嘅經驗。當然有啲客堅持要我哋保證有成果,不過我都係嗰句,無可能!因為數據都唔係萬能㗎!

真係識

老實講識同唔識嘢嘅人好易分辨出嚟,因為做兩做就知道係龍定係鳳!就好似啲人話風水佬呃你十年八年一樣,氹你落搭有幾難,因為你都唔識,所以不要問只要信!就係咁好多時就會出事!當然事前真係一個信字,只不過現實同想像嘅係兩回事。所以口碑係勝於一切,唔係話平嘢無好嘢,貴嘅亦都有佢嘅道理。最緊要係做到嘢,講乜都係假,因為最終嘅結果就係最好嘅證明!

柒柒柒

有啲人話前幾日大家係度發緊夢,而今日大家終於瞓醒!當然人係需要發下夢,如果唔係又點會有機會改變?當然係點票嗰一刻真係希望薯片叔叔會成為我哋嘅特首,只不過心底裏亦都知道嚟個可能性極低。有時唔係淨係睇黨派咁簡單,就算明知係建制派又如何,最起碼佢真心為香港!所以一個人嘅品格係更加重要!如果你認為六八九嚟隻狐狸無品嘅話,咁柒柒柒嚟個奶媽會比隻狐狸更加無品。

講民主

民主就係指每一個人都有自己嘅空間同自由去做任何嘢。好多人雖然對今次嘅美國總統大選感到意外,但係不得不承認嚟個就係一個民主嘅社會,而結果係有大部份嘅美國人都支持特朗普。有啲人會話嚟個就係民主社會嘅漏洞,但係其實嚟個正正係一個防止一權獨大嘅機制所產生嘅結果。就算有幾唔想特朗普做總統都好,而家已經係一個無可改變嘅事實。大家唯一可以做嘅就係希望佢做好以下落嚟嗰四年總統,等下次大選嘅時候再用選票踢佢走。