兩歲半


個人分享
Tagged With: , , , , , , , , ,

唔經唔覺由港島東搬咗嚟新界西兩年,當初都係希望郭大少有多啲地方走動同空氣會好啲。雖然從來未住過九龍同新界,而家就慢慢習慣咗。不過又開始諗郭大少讀書嘅嘢,所以又係時候諗下係唔係要搬去第二度。今時今日係香港讀書真係慘,但係無辦法個遊戲規則就係咁,如果政府同學校一日都唔改,最後唔係辛苦我哋嘅下一代,而係連父母都辛苦埋一份!

東方昇

真係好耐無睇無線嘅劇集,但係最近又有新一輯嘅「世界零距離」咁當然要睇下今次方東昇又有啲乜嘢金句帶俾各位觀眾。如果唔係佢咁多金句應該都唔會吸引咁多人睇。因為最近啲劇集真係無一套吸引,就算想睇道無計,因為要等郭大少瞓咗我哋先至會開電視。雖然個節目只係播咗三集,但係已經好好笑。更重要嘅係真係有嘢睇,有嘢笑,有嘢學嘛!好難得係有啲咁嘅節目當然要坐定定睇啦!

超現實

之前都有討論過人生價值觀嚟個問題,老實講有時自己都覺得慢慢被香港嘅環境侵蝕,就好似以前係中國做嘢咁,慢慢變得內地化。當然每個人都有唔同嘅價值觀,你以為自己無變,但係其實係不自覺咁變緊。只不過因為慢慢咁逐少逐少改變,所以自己唔係好察覺。正所謂近朱者赤,近墨者黑,慢慢就會被同化。人要生存係一個好現實嘅問題,而係香港真係窮得剩低「錢」嚟個價值觀!

數據化

估唔到今晚「新聞透視」竟然講數據,而且用「數據年代」作為題材。而作為香港推動數據分析嘅其中一份子,嚟個題材當然好吸引。不過都係果句,唔好再用「大數據」好唔好?事實上數據係如何產生?當然係透過我哋每日所做嘅嘢而產生,而就算你係屋企唔出街都會有數據產生。數據唔係萬能,但係如果將數據運用係適當嘅地方,其實係可以優化好多我哋生活嘅問題!

方東昇

當然唔係個個人會睇無線嘅節目,但係有時真係係屋企無無聊聊都會開著個新聞台係咁播。如果大家有留意,本來係無綫新聞台播開嘅「世界零距離」無啦啦唔知點嘅會係無綫翡翠台十點半嘅時候播。當然佢最主要嘅內容就係去一啲我同你都未必去嘅地方。講真有啲地方都幾特別,唔講真偽唔知有嗰個地方存在。雖然唔係啲乜嘢大製作,只係一個新聞報導員主持嘅一個節目,不過就幾有趣。