三週年

三年前嘅今日,我哋由兩個陌生人變成夫妻。眨下眼又一年,而過去一年大家嘅重心都放咗係郭大少嘅身上,二人世界嘅時間變得越來越小。當然無諗過一個小朋友會帶嚟嘅改變係咁大!莫講話可以安安靜靜咁坐低食餐飯,就連可以傾計嘅時間都好少,事關忙完一日大家都已經筋疲力竭。所以而家可以兩個人一齊去享受下都真係一件幾難能可貴嘅事。

脫晒節

過去嗰兩個星期,真係除咗做嘢之外,好少靜靜地咁上網。近期嘅生活係起身,餵奶,換片,少睡,起身,做嘢,睇下老婆同陪月有乜嘢要搞,睇公司電郵,回覆客戶,需要時開會,陪月走咗就做埋佢個份,整翻熱晚餐食,洗碗,烚奶樽,抹下嘢,吸下塵,照顧大仔嘅嘢,再快手快腳寫文,有空檔就快手沖涼,等個仔起身食嘢,再執好晒啲嘢,再做下嘢先瞓覺。