五十九
我諗今個月最開心嘅就係迪士尼開返！因為又可以唔駛諗同佢去邊放電。當然依家要預早七日訂位，不過好彩係佢開返嘅第一個星期六已經可以去到。真係整整五個月無去過，而感覺好似第一次去咁見到啲新嘢都會話嚟啲之前無㗎喎！除此之外，今個月真係唔記得去咗幾多次海灘，真係一好天同有時間都會去，因為真係唔知同佢可以做乜。之前諗住佢大個咗可以試過去行街，但係到最後都係搵自己嚟搞。有話攰，又話悶，真係激死！
被動的
好多人都會諗移民，而通常第一樣嘢就會諗嘅就係點樣生活。當然去到新環境，有無嘢做都真係幾緊要。除咗要面對新環境，新生活之外，如果從來無去過其他地方工作嘅話，其實都會係一個幾大嘅挑戰。今日同朋友傾開，依家科技發達，其實好多時都可以遙距工作。只要香港有個對口，其實都唔會有太大嘅問題，尤其今次疫情改變咗好多營運嘅模式。
新正常
因為一個突如其來嘅病毒，令全球改變咗生活同工作模式。以前大家覺得唔正常嘅嘢變得好正常，而亦都將以前正常嘅嘢邊得好唔正常。咁乜嘢先至係新正常？最起碼而家世界各地都知道帶口罩嘅重要性。無得去旅行，無得去公幹，無人搭飛機，無人訂酒店，完全好正常。原來好多工作係可以唔需要返公司先至做得，係屋企做亦都可以。如果真係繼續講真係有排數。
第十七
唔覺唔覺又一個月，本來今日應該寫其他嘢先，但係點都係記錄郭小姐嘅成長緊要啲。當然相比起郭大少，佢冇乜話點樣出去上堂，大部份時間都係同我哋一齊，但係睇得出有個頑皮嘅哥哥，好多嘢都係跟著佢做。正所謂好嘅唔學，學晒郭大少啲曳嘢！當然有時真係俾佢哋激死，因為細妹學阿哥，但係阿哥見到個妹做就話佢曳，無限輪迴。其實邊個先至最曳呢？真係大嘅唔好教壞細！
零個案
香港由農曆新年之前就已經開始對武漢肺炎有所警惕，全因為當年沙士嘅慘痛經歷。當全球仍然當隻肺炎係流感嘅時候，我哋香港人已經周圍搵口罩，準備最壞嘅情況。除咗香港政府嘅後知後覺，實施一堆濟後嘅措施導致香港出現第一波同第二波嘅海外輸入之外，老實講香港嘅感染個案應該會更早出現零個案。所以我哋應該為香港人自豪，政府就算把啦！