人到咗某啲年紀就要經歷生離死別，雖然明白嚟個道理，人總會離開呢個世界。當然人老去係自然定律，不過當你身邊有相約年紀嘅朋友離開嘅時候，自自然然又會反思究竟人其實係幾咁脆弱。係唔係真係去到失去先至去回憶，去珍惜係自己人生出現過嘅每一個人。係唔係將所有嘢變得太過理所當然？相信大家總有機會再見，相信人生仍然有大把時間，但係到最後其實再無咁嘅機會。淨落嚟嘅只係腦入面嘅回憶同畫面。

係嚟個世界上有好多嘢係用錢買都買唔到！就好似時間咁樣，一分一秒咁樣過，無得返轉頭。當然好多人都會話要善用時間，想每分每秒都用得其所，因為人生話長唔長，話短唔短，應該用最短嘅時間做最多嘅嘢。以前或者想一日有四十八小時，因為啲嘢做極都做唔完。但係人大咗，而家就希望時間唔好過得咁快，因為唔想郭大少大得咁快。但係點都好時間係買唔到。

每次睇到一位朋友嘅網誌都百感交集，因為佢將過去一年自己抗癌嘅經歷全部紀錄落嚟。由知道佢有病開始，到佢開始寫網誌，基本上佢每次一有新嘅網誌，我都會去睇。雖然只係通過文字知道佢嘅狀況，但係已經感受到佢所經歷嘅每一件事。有時心入面真係唔好受，經常會問，點解會發生係佢身上？點解每次好似見到佢好返少少嘅時候，又會出現其他嘅問題？

好多人都會話自己嘅工作好忙又或者因為要搵錢所以就無乜時間陪小朋友，而小朋友成長嘅速度真係實在太驚人，不知不覺時光飛逝佢哋已經識行識走，生活入面再唔只係得父母。你以為佢哋好細個唔識嘢，乜都唔知？其實佢哋對四周圍嘅環境同事物好敏感。好多人話等佢大個先至彌補，但係當佢哋大個咗之後，佢哋有自己嘅生活，根本就無需要再依賴父母。所以到最後錯過咗就係錯過咗，無得返轉頭！

現今科技發達，幾乎每個人都會有一部智能電話。本來科技嘅原意係令生活更加方便，但係亦因為科技而令人與人嘅關係疏遠。你每日究竟會花幾多時間係部電話到？有時我都覺得好好笑，因為而家真係越嚟越少人會打電話，好多都係用即時通訊軟件溝通。咁電話唔係用嚟打電話，咁其實同一部電腦有乜嘢唔同？過去十年科技嘅改變對大家嘅生活真係好大，但係偏偏自己嘅工作就同科技又關。