論壇戰

今晚薯片叔叔真係不斷擊倒奶媽,單單話奶媽係網上直播嘅「嬲嬲」已經上到鼻就已經笑到碌地!再加上之前奶媽話如果民意唔支持自己嘅話就會辭職,所以薯片就用最新嘅民調狙擊奶媽,而最新嘅唔支持率係百分之四十五,即係未上任淨值已經負數,問佢係唔係應該考慮退選。當然奶媽又走出嚟認叻話某個民意調查話佢已經超越薯片!其實邊有可能呀?所以薯片即刻反問奶媽佢竟然相信嗰個調查!

入閘啦

相信好多人都好關心究竟曾俊華同胡國興夠唔夠提名票入閘參選特首。三月一日就係特首選舉提名期嘅最後一日,因此係嗰日之前要得到一百五十名選委提名先至有機會去參選。當然林鄭月娥得到一大班建制派支持所以好早就已經得到所需要嘅提名票。當然提唔提名係選委嘅選擇,所以提名期只係一部份人將會投票嘅意向。而如果按照目前嘅提名,應該已經超過六百個選委已經表態。當然最終都要到選舉當日先至知道最終嘅結果。

曾蔭權

上個星期前特首曾蔭權被控公職人員行為失當罪成,當然好多人都會話抵佢死!無可否認佢係有罪,但係佢最起碼唔係一個壞人。一個服務咗香港社會咁多年嘅人,由低做起,直至到特首,咁多年經歷過香港好多風風雨雨!雖然佢未必係一個好嘅特首,但係如果論功績,佢一定比好多人多好多。如果真係講貪嘅話,真係大有人在!如果有罪嘅話,當今特首梁振英都應該一樣有!

又亂嚟

相信大家仲記得去年美國總統選舉嘅時候,好多唔同嘅媒體都會用唔同嘅數據嚟做分析。點知全部都錯晒!而最近亦見到有本地公司話用「大數據」去分析特首參選人相關嘅帖文及留言,睇下究竟啲網民支持邊個同講啲乜嘢比較多。雖然見到有人嘗試利用數據去做選舉嘅分析,但係睇完佢哋所採用嘅數據之後,發現佢哋有同一個問題就係數據來自社交媒體,同時所涵蓋嘅範圍亦都比較窄!

估唔到

近排真係講好多關於政治嘅嘢,不過真係日日新鮮。當然好多人而家嘅焦點都係放咗係兩個司長身上,一個真係估唔到咁離地,就連八達通都唔知點用,屋企無廁紙但係又唔知便利店無,甚至乎今時今日連一個社交網站嘅專業都無嘅人,講真離地到一個地步你會質疑點解佢可以做政務司司長。仲話佢嘅職責係解決民生事宜,長遠規劃社會基建,以及制定人口政策。如果佢做特首嘅話,可想而知會有幾大鑊!