曾偉雄

「潛水」
睇返嚟個「一哥」真係唔知點評論佢好。自從「雨傘運動」開始一直潛水,直到件事完結先浦頭。真係「彩就佢拎,鑊就你孭」,依家日日高調出嚟講嚟樣講嗰樣。唔係你老細「689」要你出防暴同放催淚彈意圖清場,你有點會硬着頭皮同你啲細講「你哋冇做錯到!」嚟以圖挽回啲細嘅士氣。如果你係妥你老細,就唔會係10月中嘅授勳儀式同佢近乎零交流,仲唔握手,之後仲要補鑊影返。。。

銅雨傘

「銅鑼」

雨傘運動嘅開始嘅時候大多數嘅時間都會去銅鑼灣。原因當然係我平時大部份時間都係銅鑼灣出沒。開頭我會去物資站幫手同去派物資俾啲市民,之後就間唔中先落去。銅鑼灣比起金鐘,旺角好唔同,經常被大家冷落。傳媒亦都好少報導,但係我可以講「銅鑼灣」係一個永不放棄,堅守到底嘅地方。無人諗過銅鑼灣係可以留到最後嘅據點,因為人相對少,範圍亦係最細!清場其實話咁易!

無雨傘

「正常」

今日去立法會開會,如常揸車去到中信大廈對面嘅一個小小停車場。其實運動期間,個停車場除咗係傳媒泊車嘅地方之外,我每次落去都會泊係個度。好似已經習慣咗唔行「夏慤道」,又或者我選擇避開唔行。無論係點,經過一日嘅清場,人去留空,你已為回覆正常,但係當你見到我哋留低嘅痕跡,你個心會有啲唔舒服。一個難以形容嘅心情。

鳩嗚呀

「鳩嗚」
其實好多人都唔知點解。所以先解釋下。「鳩嗚」係普通話「購物 gòuwù」嘅音譯,本身嘅意思係「買嘢」。係 2014 年反佔中遊行參與者被傳媒訪問,一時之間諗唔起廣東話點講,用普通話講「購物」一詞,暴露咗外地人身分。後來大家用粵語諧音「鳩嗚」將呢個字寫出嚟,去表達字面上「亂咁嗌」、「亂咁講嘢」嘅意思,同時亦都用嚟諷刺自由行喺香港瘋狂買嘢嘅行為。