不變的

好多人話經過咁多年,大家只係用同一種方式去爭取,用同一種方法去平反,其實都係冇用。當然方法係可以改變,但係承傳就更加緊要。歷史係用文字去記錄發生咗嘅事同物,等下一代係歷史當中了解人類嘅成與敗。但係當一個國家意圖或企圖篡改歷史,否認歷史,打壓尋求真相嘅人,咁就算國家有幾強大幾發達都好,永遠都會有一個歷史污點,永不磨滅。

管理層

點解海洋公園會搞到今時今日嘅局面?好唔容易先至捱過逆境,有好嘅盈利,有好嘅團隊,但係點解要換走一個咁做得嘢嘅主席?其實大家應該最記得係盛智文嘅年代,因為好多新嘢都係佢接管嘅年代創造出嚟,就好似萬聖節嘅「十月全城哈囉喂」。而好多嘅獎項都係盛智文年代所獲得,包括國際遊樂園及景點協會博覽會(IAAPA)頒發頂尖榮譽大獎「2012 Applause Award」(全球最佳主題公園),成為首座亞洲主題公園獲得嚟個大獎!

創新高

大部份嘅香港人或多或少都有買過股票,就算無嘅話,你嘅強積金其實都會同股票市場掛鈎。當然好多人發達都係靠買賣股票,亦有好多人因為買賣股票而破產。香港經過好幾次嘅股災,所以好多人都經一事長一智,依家投資會好小心。不過近日個股市屢創新高,好多人仍然覺得個股市仲有排升,只不過睇返數據嘅話,其實真係好危險,雖然未必大跌市但係小心為妙。

遼寧艦

遼寧艦係由前蘇聯航空母艦瓦良格號改建而成。因為當年蘇聯解體,俄羅斯因為經濟問題無法同烏克蘭達成繼續建造嘅協議,瓦良格號正式退出俄羅斯海軍編制。俄羅斯拆除部分裝備之後就以償還債務嘅名義將瓦良格號交予烏克蘭。之後烏克蘭將瓦良格號出售,而中國當時就已二千萬美金買咗瓦良格號同三十幾萬張設計圖。直至二零零二年嘅三月先至到達大連港。

二十年

其實點解香港每年都要慶祝回歸?慶祝咗二十年點解仲要慶祝?要香港人記得同面對香港已經回歸中國嚟個事實?定係要年輕一代記住香港永遠都係中國?點解係五十年不變,唔係二十五年或者一百年不變?點都好,香港曾經係英國嘅殖民地嚟個係事實,香港係中國嘅其中一個城市亦都係事實。無人可以推翻歷史,只不過真係有必要每年都要慶祝回歸嗎?究竟要慶祝幾多年先至夠呢?