錯時機


個人分享
Tagged With: , , , , , , , , ,

做生意好多時候都係要睇時機,就好似以前珍珠奶茶,好多人見到好多人飲,之後就開到一街都係,但係市場係會飽和。所以通常賺到錢嘅都係第一水開舖嘅人,之後所謂嘅加盟店其實相對嘅賺錢能力會低咗。所以好多時做生意都真係好睇時機,因為如果錯過咗機會嘅話,分分鐘最後蝕錢收場。就好似好多人因為今年嘅亦稱而去投資開廠做口罩。

被轉型

網上因為武漢肺炎大家除咗被創業之外,當然就係被轉型。當然有一部份嘅人因為今次嘅疫情導致無收入,失去工作。係咁嘅市況之下,要搵工都唔係一件易嘅事。當然有啲公司係逆市請人,因為好多人才流入市場,係一個唔錯嘅時機請人。但係亦都有一部份嘅人就要急急轉型,因為就算疫情過去之後都未必有嘢做。有危便有機,好多人只係過唔到自己嘅安全網而已。

下一步

下一步大家會做啲乜?當然坐係度乜都唔做,淨係希望個市會好返,其實真係同等死無分別。就算疫情有所紓緩,但係可唔可以回覆返幾年前咁,其實都真係一件好難嘅事。上年年底已經諗住過完年重新佈陣,事前都已經準備同安排咗好多嘢,但係依家就算傾緊嘅項目同工作都無辦法繼續。雖然唔係第一次打逆境,但係環境唔同咗,今次難度亦都比較大。唔死就已經贏咗!

快一步

創業好多時都係講求一個字,就係快!正所謂快人一步理想達到,只不過係唔係快就代表一定成功?有時其實快係無用,因為市場仲未成熟,就算你快過人又點?根本上無需求,咁同食穀種係無分別,除非你覺得有一日你嘅產品或者服務有市場需求,只不過有可能係無了期咁等。所以如果淨係得個快字係無用,快都要睇時候。當然有時都要睇行業嘅性質,就好似一啲餐飲業,佢哋真係要靠個快字!