點分析
真係唔經唔覺做咗數據分析嚟個行業十幾年，不過咁多年嚟遇到嘅問題都係大同小異。最關鍵嘅問題唔係用啲乜嘢工具去收集數據同分析數據，而係究竟點解要數據！好多公司都覺得數據係免費，就算你用 Google Analytics 嘅免費版本都好，背後其實有好多功夫要去做。正所謂一子錯滿盤皆落索，因為開始嘅時候根本無好好咁計劃點樣收集數據，所以當開始分析數據嘅時候先至發現好多問題，與此同時亦都解答唔到任何問題。
學啲乜
當然好多人想加入數據分析嘅行業，不過首先要了解一樣好緊要嘅嘢就係啲數據其實係點樣收集，而收集嘅目的係啲乜。另外亦都要了解新嘅技術同限制，因為不同行業有不同嘅要求。而家要做數據分析，最基本嘅工具包括收集網站同手機程式嘅用戶行為 （Google Analytics 同 Firebase），標籤管理（Google Tag Manager），用戶測試同個人化（Google Optimize）同數據圖表化（Google Data Studio）。
新思維
究竟 Google Analytics 2.0 係指啲乜？其實最大嘅分別就係將網站同手機程式結合，等企業可以無縫咁了解用戶係唔同嘅平台之間點樣游走。不過有一個關鍵位就係註冊用戶同非註冊用戶。如果係註冊用戶，咁就好容易透過佢哋嘅用戶號碼去將線下，手機同線上嘅行為連貫起嚟。而記錄嘅係每一個用戶同平台嘅互動而唔係傳統嘅訪問次數，瀏覽時間，睇過嘅訊息。因為嗰啲訊息係已經再無執行價值亦都好難好快咁提高銷售！
又教完
今年真係有大部份嘅時間都係教緊書，有時真係好佩服全職教書嘅朋友！因為教書真係挑戰聲帶嘅極限，最瘋狂嘅係一個星期教四日，有時仲要連續講七八個鐘頭嘢。其實教書真係好攰，所需要嘅體力真係唔可以低估，教完之後基本上個人只係想靜靜哋休息下。雖然之前都有返開大學教書，但係都只係一個星期一日，而且只係三個鐘，而同而家比真係覺得輕鬆！
速成班
過去幾個月都係比較專注係開班教分析數據嘅業務，當然係因為之前有好多人都問我邊度有堂上。雖然已經行咗一排，不過係唔同嘅地方都見到有其他公司都有開唔同類型嘅課程，有時亦都會諗大家嘅定位有啲乜嘢唔同。我相信最大嘅分別係宣傳手法同課程嘅價錢定位，而好多時見到佢哋最常用嘅字就係速成！咁明白嘅，因為香港人忙所以樣樣嘢就當然希望學完就用得，只係現實同希望係兩回事！