再出發

香港再出發?出發去邊?其實真係要幾咁老土嘅人先至會諗啲咁老土嘅嘢?我諗都係得啲無聊人先至會做!如果你問香港人想出發去邊,我諗而家好多香港人最想嘅就當然係出發去旅行啦!好老實講其實要轉型,要再出發嘅人都已經出發左!我諗只有固步自封同依賴傳統經濟嘅人先至仲未諗到點出發!要重新開始嘅人係唔會因為逆境而停步,反而係加快咗佢哋嘅腳步!

離晒譜


個人分享
Tagged With: , , , , , , , , ,

香港仍然係我哋嘅香港嗎?以前我哋長大嘅地方點解變得如此荒謬?香港人所相信嘅法治點解會變成咁?究竟邊個先至係受害者?法官唔係應該中立嘅咩?點解可以將是非黑白完全顛倒?竟然可以高調咁將對社會運動嘅譴責,甚至乎將犯罪人嘅行為同責任推卸去一場社會運動,真係十分之荒謬。係法律面前係應該公平公正,唔應該因為任何人嘅背景而去作出任何嘅判決!今次證明咗香港有一部份嘅法官嘅專業操守!

好忙呀

我諗好多人都唔明新任律政司長鄭若驊點解可以買咗間屋咁耐都無發覺自己間屋其實係有僭建!當年特首嚴厲打擊違例僭建,依家佢又會點樣處理?而鄭若驊竟然話自己工作太忙,太多嘢做所以無為意有違規!嚟個解釋真係好難去理解,更何況佢係一位律師?有好多嘢其實係唔需要搵專業認可人士都可以知道間屋係有僭建。嚟個真係關乜嘢警覺性及政治敏感度不足咩嘢事?

三子案

香港社會點解撕裂?好明顯就係因為政府講一套做一套!嗰頭話要聆聽年輕人嘅聲音,轉過頭就要覆核刑期!一時強調法律,一時強調包容,但係就因政治立場而各有不同嘅緣故!其實都已經預咗個政府係咁,講就好好聽,而且仲大條道理,咁仲講乜嘢無政治考慮?年輕一代係社會嘅未來,一個民主嘅社會係唔應該打壓唔同嘅聲音。官逼民反,道理好簡單,何必要處處逼人?

林子健

老實講,一開始聽到有民主派嘅人俾內地執法人員擄走,當然覺得好離譜。但係諗深一層就真係有少少奇怪,因為無啦啦劉霞會想要一張美斯嘅簽名相?點解一個人被人虐待之後,竟然唔係去醫院而係返屋企沖涼?最神奇嘅係咁多訂書釘,唔通真係唔痛,點解仲要開咗記者會先?真係好多問號!究竟係真係俾人擄走虐待,定係一個自編自導嘅故仔?無論係點,都真係要查清楚先至知道。