唔經唔覺就一年！一百萬人遊行佢唔理！二百萬人佢又唔理！香港嘅亂局係邊個造成？大家不滿嘅係政府嗰班所謂嘅問責官員，同時當日大大聲聲同全香港市民講，如果大家希望佢落台嘅話，就會落台嗰位特首。好多人都繼續堅持，繼續守護大家嘅「家」，就算仲有二十幾年先至到五十年，大家都係依然希望繼續爭取。咁一年之後又會係點？

因為一個突如其來嘅病毒，令全球改變咗生活同工作模式。以前大家覺得唔正常嘅嘢變得好正常，而亦都將以前正常嘅嘢邊得好唔正常。咁乜嘢先至係新正常？最起碼而家世界各地都知道帶口罩嘅重要性。無得去旅行，無得去公幹，無人搭飛機，無人訂酒店，完全好正常。原來好多工作係可以唔需要返公司先至做得，係屋企做亦都可以。如果真係繼續講真係有排數。

相信香港好耐無試過一個無遊客嘅黃金週。當然好多人以前係靠內地遊客係假期嚟香港旅遊同消費。當然最受惠嘅都係旅遊業，零售業，飲食業等等。但係香港人就覺得好攰，除咗平時自由行，水貨客搞到好多地方都人多擠迫。最大嘅問題就當然係質素問題！而當大家過去咁多年都好容易賺錢嘅時候，當遇到逆市嘅時候，就好似而家咁。其實太過依賴單一收入來源先至係問題所在，而且係市況好嘅時候唔改變，到問題出現嘅時候就已經太遲了！

人越大就好似越少影相，我自己係單人照。要搵舊相都比較容易因為細個都會俾人影。就算而家有部手機，自拍雖然方便，但係我諗男仔就真係好少自拍。自己鍾意影風景，影小朋友，依家就連相機都好少用，因為手機真係實在太過方便。雖然同相機有好大出入，不過同小朋友出街真係好難下下帶部相機出去。當然睇返相有好多回憶，甚至乎有時睇番都覺得幾好笑。然後會問點解嗰陣時會影張咁嘅相。

香港由農曆新年之前就已經開始對武漢肺炎有所警惕，全因為當年沙士嘅慘痛經歷。當全球仍然當隻肺炎係流感嘅時候，我哋香港人已經周圍搵口罩，準備最壞嘅情況。除咗香港政府嘅後知後覺，實施一堆濟後嘅措施導致香港出現第一波同第二波嘅海外輸入之外，老實講香港嘅感染個案應該會更早出現零個案。所以我哋應該為香港人自豪，政府就算把啦！