被騎劫

好地地嘅一個網上直播嘅演唱會,無啦啦走出嚟係社交平台出篇文,搞到好似同佢有關咁,仲要出埋相拉關係。其實真係可唔可以唔好騎劫人哋做嘅嘢呢?人哋出嚟搞個免費演唱會其實係為咗一班失業嘅通利琴行員工人去籌款。作為一個特首究竟做咗啲乜?老實講除咗自己本來加人工,唔被踢爆都唔出嚟話將自己份糧拎出嚟之外,講真香港人靠你真係死得!

攻防戰

唔知大家有冇留意琴日嘅一場關公大戰。事緣係某份報紙將兩大相機品牌掉轉咗,因此掀起網絡熱話。而兩大品牌互相對壘,各自抽水。當然今日個份報紙重新出返一份正確嘅新聞稿,但係兩大品牌背後嘅高手過招真係十年難得一見。今次嘅事件真係可以被定性為關公攻防戰。非常精彩,同華山論劍真係可以相提並論。

我又抽

見大家抽得咁開心,等我又抽下水先!不過唔好打頭!嚟幾日大家都喺度討論緊「Snickers」個新抽水廣告:「十做九錯 全因肚餓?!」。當然係香港嚟個地方,好多公司都會周不時抽吓水。但係抽中就話啫,如果唔係一個唔覺意抽錯嘅話,後果唔單止影響品牌之外,之後要處理佢都幾煩。所以抽水同買大細一樣,一係就贏,一係就輸,或者通殺!