一百萬
唔經唔覺就一年！一百萬人遊行佢唔理！二百萬人佢又唔理！香港嘅亂局係邊個造成？大家不滿嘅係政府嗰班所謂嘅問責官員，同時當日大大聲聲同全香港市民講，如果大家希望佢落台嘅話，就會落台嗰位特首。好多人都繼續堅持，繼續守護大家嘅「家」，就算仲有二十幾年先至到五十年，大家都係依然希望繼續爭取。咁一年之後又會係點？
選委會
香港嘅特首係由一個一千二百人組成嘅選委會通過投票而決定邊個會成為香港嘅特首。就係因為咁香港嘅特首唔係一人一票選出嚟，而係由功能界別嘅選民，投票選出代表佢哋嘅委員去投票，因此被喻為小圈子選舉。正正因為咁，作為一個功能組別嘅選民就更加應該去投票俾代表自己業界嘅委員。不過過去咁多年好多人都唔知佢哋有得投票，甚至乎覺得投嚟都無用。不過如果自己有票都唔投，點樣對得住自己嘅下一代？就算好難去改變都好，最起碼自己盡咗本份！
大奇蹟
經過咗咁多個月，今日美國總統大選終於揭盅！今日基本上所有嘅媒體都實時報導美國總統選舉嘅情況。好多人都會問點解香港人咁關心美國嘅總統大選，其實都唔難理解。事關香港嘅經濟除咗因為受到中國嘅影響之外，環球經濟對香港嘅影響亦都好大。雖然之前睇過好多數據嘅分析都指出特朗普勝出嘅機會都比較大，但係真係接受唔到一個咁瘋狂嘅人成為美國總統。不過學好多人話齋，結果如何最起碼四年之後佢哋有權再選過，只不過要等四年啫！
投票日
相信今年應該有好多人都出嚟投票，因為大家都希望改變過去幾年嘅社會風氣。今年嘅新聞特別多，當中當然唔少得啲公公婆婆被安排去投票，而自己都遇到一個問題就係無啦啦無咗超級區議會嘅投票權。我問佢哋嘅時候，佢哋話我改地址嘅時候無選擇要登記做選民。老實講我改地址咋噃，唔係改我登記做唔做區議會第二功能界別嘅選民。所以即刻登記返，如果唔係下次又無得投！
選擇權
每個人都有自己嘅選擇權利，但係如果自己都放棄嘅話，老實講到最後你只係俾個社會牽著你走。當然好多選擇都唔係可以好容易去做決定，但係咁就代表你就可以唔選擇？因為如果你唔選擇，人哋都會幫你選擇，但係最後個結果係好與壞，你都只可以默默咁接受。好多人輸打贏要，而當大家都變成輸家嘅時候，其實有無諗過當初係自己放棄咗個選擇權？