告別了


個人分享
Tagged With: , , , , , , , , ,

人到咗某啲年紀就要經歷生離死別,雖然明白嚟個道理,人總會離開呢個世界。當然人老去係自然定律,不過當你身邊有相約年紀嘅朋友離開嘅時候,自自然然又會反思究竟人其實係幾咁脆弱。係唔係真係去到失去先至去回憶,去珍惜係自己人生出現過嘅每一個人。係唔係將所有嘢變得太過理所當然?相信大家總有機會再見,相信人生仍然有大把時間,但係到最後其實再無咁嘅機會。淨落嚟嘅只係腦入面嘅回憶同畫面。

五十九

我諗今個月最開心嘅就係迪士尼開返!因為又可以唔駛諗同佢去邊放電。當然依家要預早七日訂位,不過好彩係佢開返嘅第一個星期六已經可以去到。真係整整五個月無去過,而感覺好似第一次去咁見到啲新嘢都會話嚟啲之前無㗎喎!除此之外,今個月真係唔記得去咗幾多次海灘,真係一好天同有時間都會去,因為真係唔知同佢可以做乜。之前諗住佢大個咗可以試過去行街,但係到最後都係搵自己嚟搞。有話攰,又話悶,真係激死!

爸爸節

做咗爸爸嚟個角色接近五年,當然一個小朋友同兩個小朋友嘅分別其實都幾大,真心佩服身邊啲朋友有三個甚至乎四個小朋友。有時都會諗其實係佢哋心目中究竟我係一個點樣嘅爸爸,自問未必係一個最好嘅爸爸,有時真係想陪佢哋多啲,同佢哋玩多啲。雖然話今年有疫情,但係其實上半年係少咗時間陪佢哋。有朝忙到晚,有時淨係想攪掂晒所有嘢可以做返自己嘢。

第十八

邊個話女仔易湊啲㗎?不過女仔就真係有啲脾氣,有時真係唔知道佢扭啲乜嘢。當然依家識行識走,同隻甩繩馬騮無分別。本來以為女仔會定啲,安靜啲,但係真係比起郭大少更加嚴重,真係以為生多咗個仔。話雖如此,佢又唔係嗰啲唔怕陌生人嗰啲,見到唔識嘅都需要啲時間去適應。希望之後返學會好啲,相信唔會好似郭大少咁一支箭咁衝咗入去連回頭望都唔望。

五十八

究竟今年郭大少返咗幾多個月學?我諗都真係一隻手數得晒!對於小朋友嚟講,返學應該係最開心嘅時間,亦都係最寶貴嘅時間。啱啱開學,雖然叫做識咗啲同學仔,只不過斷斷續續咁返下停下,然後直頭整個學期都無得返學見啲朋友。雖然話透過網上可以學習,但係我始終覺得小朋友係需要有社交接觸。當然無人諗過疫情會持續咁耐,而亦都係咁整個幼稚園學年就咁無咗。