本地化

過去十幾二十年,好多行業都會將業務全球化,將好多工作都外判俾其他公司同國家去處理。當然目的係控制成本同營運風險!不過因為今次嘅疫情令好多公司再一次研究全球化嘅利與弊。對於資訊科技相關嘅業務其實相對影響比較少,因為只要網絡仍然運作正常,基本上工作依然可以係屋企做。當然如果連網絡都受到影響嘅話,咁就真係乜都冇得做啦。

被裁員

基本上絕大部份嘅人都會有被裁員嘅機會,因為無一間公司無一份工係可以打一世!當然以前啲工真係有可能打足一世,但係依家嘅環境好唔同,經濟唔好真係隨時俾人裁員。當然年紀亦都係一個好緊要嘅因素,因為經驗多就等於人工高,好多公司都會由高成本低效益嘅地方著手。所以好多時都會聽到啲人話人到中年,俾人裁員嘅機會就越來越高!有時要再搵返份工真係會有啲難度。

小便宜

「招標」好多時都會收到某啲公司話想邀請你間公司去參與佢哋嘅項目招標,但係事前要做好多嘢都係無錢收。當然你可以話一買一賣,你中標未可以收到錢囉。其實係外國,就算提交意見書大多數都會俾錢,尤其係大嘅項目。其實到最後間公司係唔駛用錢嘅情況下就可以得到唔同嘅資訊,而且大部份時間都係因為內部流程而要搵多幾間公司投標。