挫敗感
失敗乃成功之母，係兵家常事。有時係想力挽狂瀾，只不過係唔係螳螂擋車？越失敗，越成功？對上個次覺得挫敗嘅應該係當年啱啱接咗三星嘅項目。當時自己應該壓力爆煲，亦都突然有種莫明其妙嘅挫敗感。其實當時應該開心先至真，因為將無可能變成有可能，但係或者自己覺得沒完沒了嘅工作，問題亦都兜兜轉轉，所以有啲無奈，最後突然好似一條橡筋咁，斷咗。嗰種感覺好難受，但係亦因為太多嘢要處理，所以好快就回覆正軌，繼續大戰三百回合！
定勝負
好多時當你以為自己贏梗嘅時候就會開始放慢腳步，點知就因為咁樣輸咗。其實係唔係有少少好似龜兔賽跑呢？一日未過終點，一日你都仲係未贏，那怕只係嗰一剎那，就係咁你就輸咗。所以一定唔好咁快以為自己贏硬，又或者打定輸數，勝負其實真係一線之差，只要由頭到尾都用盡全力去應付，就算最後輸咗又點？最緊要對得住自己，任何時候都全力以赴！
要取捨
人生好多時都係不自覺嘅情況下變得好在意得與失，越係想得到嘅嘢就越得唔到，而越易得到嘅嘢就變得唔矜貴。人生就係獲得與失去之間慢慢成長，而要成長就當然要跌過，碰過先至會領略到珍惜自己所擁有嘅嘢。有時有啲嘢係唔可以強求，所以所以唔好執著一啲唔屬於自己嘅嘢。咁樣你嘅人生就會輕鬆啲，開心啲。或者你今日唔明，但係相信總有一日你會明白。
難服侍
做乜嘢都好，其實間唔中都會遇到一啲難服侍嘅人。當然嫌三嫌四就不在話下，有時真係吃力不討好。最慘嘅係都唔知啲人乜嘢心態，真係以為俾少少錢就大晒，咁其實同啲暴發戶有乜嘢分別？好多時淨係講客戶嘅權利，咁做生意嘅就無權利？而家真係郁啲就話要投訴，投訴唔得就擺上網。不過大家係唔係都要將心比己呢？如果有一日你俾人擺咗上網公審，你又會點呢？
創心態
好多人都希望有一條絕世好橋可以吸引唔同嘅投資者投資落自己間公司入面，但係世界上邊度有咁多絕世好橋呢？而最後條橋真係包生仔？正所謂紙上談兵，講就真係天下無敵，有時連件產品都未面世就已經胎死腹中，又或者當初諗得太過完美而脫離現實。當然有啲人透過不斷融資，不斷擴充，然後就已最高嘅價錢賣盤！不過嚟個真係一個真正創業者應有嘅態度嗎？