拍廣告
好似真係好耐無影過相。因為而家實在太方便，所以大多數都係拎住部手機影。當然影完好多時都只會留咗係部手機入面，連執相都懶得執。不過今日有幸去拍廣告，所以幫手影啲相，希望自己無生疏。當然都會擔心影唔影到想要嘅嘢，所以係唔係都影咗先。不過都係一如以往，影完一大堆相，之後基本上得返三份之一要得，然後再篩選同執相嘅話就應該得返十份之一左右。
又報銷
有乜嘢慘過無咗部電話？其實每次部電話壞嘅原因都係因為入水，而最擔心嘅都真係無咗入面嘅相。有一次冇咗近一年嘅相，所以超級唔開心，之後真係冇計唯有俾錢將所有嘢擺晒係舊雲上面。真係好怕無晒啲嘢，因為好多回憶係入面。所以備份係好重要，好重要，好重要！真係要講三次，因為啲相無咗就係無咗。而且真係唔好懶同慳嚟啲錢，乜嘢都可以唔見，就係啲相唔可以唔見！
廿二個
郭大少真係一個好有主見嘅小朋友，而家好多嘢都要自己嚟，自己揀，唔啱心水就發脾氣！當然可以話佢硬頸，死硬派，不過如果佢大個咗之後將嚟種執著用係適當嘅地方，相信好多嘢都應該難佢唔到。雖然每個小朋友都有佢難搞嘅一面，但係如果用另外一個角度睇嘅話或者係佢哋嘅優點，只係有時就算你想咁諗嘅時候，往往都會被佢激到你紮紮跳！
港病態
首先係度希望所有因為琴日縱火案而受傷嘅傷者可以早日康復。真係諗都冇諗過竟然有人會咁變態，係地鐵最繁忙嘅時間同最繁忙嘅路線嘅車廂入面縱火！當時睇到新聞真係嚇咗一跳！雖然到最後該名全身著晒火嘅人係縱火嘅元兇，但係如果俾著你見到啲咁嘅情況，就算你唔幫手求火都應該係第一時間逃生或者搵人幫手。如果香港有一日有恐怖襲擊嘅話，相信真係會死好多人，因為真係一啲危險意識都無！
聖誕夜
去完旅行真係好鬼累，尤其係郭大少，今朝瞓醒食完奶玩咗陣無幾耐又瞓過。之後等佢起身食完嘢，大家就準備出去玩同食聖誕大餐。首站就係同郭大少去睇佢其中一個至愛，就係火車！真係好多人都鍾意嗰個火車頭，所以知道某商場有展覽就當然帶佢去睇啦。之後就去咗食飯，不過真係再一次證明聖誕節係唔應該出街食飯，因為如果用同樣嘅價錢，我真係可以買到好多嘢自己整。不過真係好累，所以先至出去食。再一中伏！