好多公司因為疫情嘅關係，大家突然之間要係屋企工作。好多人都話好唔慣，因為香港環境真係比較難。屋企已經地方唔大，有時仲要有屋企人走來走去，如果有小朋友嘅話就更加大獲。雖然好多年前已經開始係屋企工作，不過有時都係需要有一個安靜嘅環境先至可以專心工作。其實好多大公司好多年前已經有咁嘅工作安排，最主要嘅原因都係想節省開支啫！

好多人返工只係為咗份工，因為返工係為咗生活。但係如果你問大部份嘅人你鍾唔鍾意份工，又或者愛唔愛你自己嘅工作，我相信大部份嘅答案係唔鐘意同唔愛。其實如果你唔愛自己嘅工作，日復日，年復年，老實講又點會做得好呢？因為工作嘅目的同出發點根本就唔係要做好件事，而最緊要嘅係無愛！愛一份工好難，愛一個專業更難！所以做嘢係要搵一樣自己愛嘅嘢去做先至會成功！

出嚟做嘢或多或少都要應酬，雖然唔係個個人都鍾意應酬，只不過有時真係好難避免。尤其以前係中國做嘢，老細叫到你又真係無得唔去，如果係客戶嘅話就更加唔駛講就一定要去。不過除咗工作之外，其實人生仲有好多應酬，尤其係自己搞嘅話，應酬係在所難免。好多時真係需要識多啲人，因為有好多嘢自己唔識，如果有人可以幫到你嘅話，好可能會事半功倍！

相信大家出嚟社會做嘢都見過唔少工，通常都會被問到你嘅強項同弱項。咁究竟你又會點答呢？要了解一個人嘅長短，強弱唔係一時三刻嘅事，有時要係現實嘅環境去嘗試。一個團隊係要互相配合，互補長短，所以無需刻意強調自己嘅強項同輕輕帶過自己嘅弱項。用人唯才，無人係完美，而聰明嘅管理係用人嘅強項多於弱項。咁先至可以建立一個完美無瑕嘅團隊。

其實每個人係工作生涯入面都會遇到類似嘅問題，究竟係專業化定係廣泛化好？專業化即係指你對自己嘅行業嘅知識與技能深化到一個專業嘅水平，就好似醫生或者律師。而廣泛化其實係指你身懷百般武藝，樣樣都識啲只不過唔會將佢專業化，咁係唔同環境嘅情況下都可以變通走位。無論你係邊一類人，其實各有各嘅好處同壞處。而係香港有時真係比較難去專業化！