其實有好多嘢都係好基本，尤其係尊重。要人尊重你，你先要尊重別人。當然尊重有好多個層面，但係做人做事「尊重」係好基本嘅嘢。好多時唔可以因為人哋嘅年紀而唔尊重佢哋，真係有啲人以為自己真係食鹽多過佢食米而唔尊重年輕過自己嘅人。相反亦都係，有好多年輕人唔知道點樣尊重長輩，做出一啲不敬嘅行為。所以無論你係咩嘢年紀都應該尊重別人！

銷售真係一門好深嘅學問，因為唔係簡單咁簽幾張單，做一兩單生意就得。好多時都真係要有不屈不撓嘅精神，因為有時真係要試好多次先至有回報。當然有時係會浪費時間同精神，所以要知道邊啲要投放資源係好緊要。當然有時亦都要知道客戶嘅需要，如果無辦法滿足客戶要求，其實應該坦白直說。如果唔係到最後搞出一個爛攤子，損失嘅係自己嘅信譽。

依家要做網上營銷真係好複雜，因為實在太多嘢要兼顧，最大嘅分別就係日新月異嘅科技發展。當然仍然有好多公司仲需要轉型，不過要成功轉型實在唔係一件易事。最大嘅問題係在於心態。如果用傳統營銷嘅心態，其實係無可能轉型。而唔敢嘗試，唔肯改變，唔肯接受，都係常見嘅致命傷！要理解網上營銷係需要時間，只不過好多理論其實同傳統營銷係無分別。

仲記得好多年前因為自己嘅興趣開始學點樣寫網頁，亦都因為嚟個興趣變成自己嘅職業。二十幾年前嘅網頁真係非常之簡單，無而家咁複雜，亦都冇任何嘅工具可言，所有嘢都係要自己一隻隻字打出嚟！再加上自己鍾意設計，咁就係今日大家所講嘅網頁設計。不過而家仲有無人好似以前咁寫網頁？如果而家叫我寫一個網站應該要從頭學起，因為變化實在太大。

相信好多人都會有係網上面填各式各樣嘅表格，而大家都應該好憎啲又長又煩嘅表格。但係唔知點解啲公司就係都要啲用家填啲無關痛癢嘅表格，所以好多人見到要填咁多嘢都會走夾唔抖。當然數據反映一切，好多時同啲客開會都會談及到佢哋啲表格嘅問題。每次我都會問佢哋係唔係有需要啲用戶點咁多嘢！因為啲表格真係可以好趕客，所以就算真係好想要啲資料都要識可而止！