創業心

講到創業嚟個話題其實身邊好多朋友已經唔再係創業呢個階段。好多依家已經進入守業期,而除咗繼續本身嘅業務之外,大部份人都會選擇開始拓展新嘅市場。但係正因為本身業務已經相對穩定,顧慮亦會多咗,所以瞻前顧後係在所難免。隨著時間一分一秒咁過去,好多時大家都忘記咗當初點解要創業,創業個種感覺同嗰一顆創業之心。因為要再次由安全網跳入火坑,其實真係需要更多嘅勇氣。

調整期

搞一間公司唔係一件易事,更何況開拓一個新行業係急都急唔嚟。講努力我一定比唔上其他公司嘅老闆,講規模亦都無得比。但係五年就咁過咗去,而跟住五年嘅目標係乜?有時好迷茫,我諗創業同守業就係咁。不過我個目標好簡單,就係由無變有。堅持咗咁多年仲留係香港,除咗因為屋企人之外,就係希望香港有一日可以變成亞洲嘅數據分析中心。

守業難

「風險」

最近見到大大小小嘅文章或報導都係到講咁次嘅社會運動影響香港經濟,甚至乎有啲小商舖話生意大跌同面臨執笠。事實上,無影響就真係呃你嘅。但係做生意唔係都係咁嘅咩?係有風險同起起跌跌㗎啦!唔通一定順風順水嘅咩?如果連做少幾日或幾個月生意而令到你執笠,咁你真係要認真諗吓應唔應該做生意或者有乜嘢可以解決面前危機。齋抱怨係幫唔到你,因為經唔起風浪嘅生意遲早都會執。除非你玩短炒同潮流嘢,唔係一定唔長久。