禮義廉
乜嘢係四維？中國人嘅傳統係有四維八德，而四維係指禮義廉恥。正所謂四維不張，國乃滅亡！一維絕則傾，二維絕則危，三維絕則覆，四維絕則滅。不過係現今嘅新世代好似唔見咗嚟四樣嘢。做人嘅基本係應該有禮義，禮係指規規矩矩嘅態度，義係指正正當當嘅行為。當然出自之外就係廉恥，廉係指清清白白嘅辨別，恥係指切切實實嘅覺悟。
讀書為
今年真係不斷教書，但係有時真係遇到一啲好奇怪嘅學生。有時心諗其實佢哋究竟點解返學？當然好多人都會選擇去繼續進修，而好多時都係要真金白銀咁俾錢去讀。既然俾咗錢咁點解又唔認真咁去讀呢？唔通真係諗住隨隨便便上完堂，考個試，然後就拎完張證書，等自己可以升職加薪？乜讀書唔係為咗增進知識？嘥咁多錢同時間，為嘅係啲乜嘢呢？如果係咁不如唔好讀啦！
又教完
今年真係有大部份嘅時間都係教緊書，有時真係好佩服全職教書嘅朋友！因為教書真係挑戰聲帶嘅極限，最瘋狂嘅係一個星期教四日，有時仲要連續講七八個鐘頭嘢。其實教書真係好攰，所需要嘅體力真係唔可以低估，教完之後基本上個人只係想靜靜哋休息下。雖然之前都有返開大學教書，但係都只係一個星期一日，而且只係三個鐘，而同而家比真係覺得輕鬆！
改試卷
其實老師教書真係唔係最難，因為出試題都好難！太過簡單又好似測試唔到究竟啲學生學唔學到嘢，太過難又改到自己傻咗！所以出試題都係一門學問！當然每個老師都希望自己嘅學生可以考到好成績！而唯一可以知道啲學生吸唔吸收到啲知識，唯一可以知道嘅就係考試！當然自己都曾經係一個學生，而學生最唔鍾意嘅就當然係做功課同考試！而老師最唔想就係改試卷！
考完試
我其實唔鍾意考試，最努力讀書嘅時候應該係高中，因為希望自己考到入自己心儀嘅大學，去讀自己鍾意嘅科目。當然到最後失望而回，但係諗返嗰陣時真係自己最勤力讀書嘅階段。之後隔咗好多年再重返大學已經係十幾年之後，而其實我唔係為求分數，只要畢到業就已經足夠。當然考試係要盡自己最大嘅能力，只不過有時見到自己啲學生無盡力考試嘅時候，其實心入面都會有少少唔開心！