全日制
仲記得細個返學嘅時候仍然有分上下晝班，屋苑樓下通常一到咗晏晝就一定有小朋友係度玩。但係而家基本上唔會再見到小朋友係屋苑樓下玩，原因係好多時小朋友放咗學之後仲有唔同嘅課外活動。返到屋企食完飯仲有一大堆嘅功課要做，所以佢哋邊度會有時間去玩呢？莫講話啲小朋友辛苦，其實大人亦都一樣。只不過原本教育局希望推行全日制嘅目的唔係想學校有更多時間去教育小朋友咩？
港德育
教育小朋友除咗學術方面之外，其實個人認為比學術更加重要嘅係德育。因為德育係要由細開始培養，而學術真係幾時都學得到。一個小朋友成長後點樣待人處事其實係書本入面係學唔到嘅。唔同嘅國家有唔同嘅標準，亦都因為小朋友大部份成長嘅時間係校園，所以要選擇一間好嘅德育其實係重要過一間只係專注學術嘅學校。就算讀書又幾叻都好，如果無好嘅品德其實就已經大打折扣。
讀書為
今年真係不斷教書，但係有時真係遇到一啲好奇怪嘅學生。有時心諗其實佢哋究竟點解返學？當然好多人都會選擇去繼續進修，而好多時都係要真金白銀咁俾錢去讀。既然俾咗錢咁點解又唔認真咁去讀呢？唔通真係諗住隨隨便便上完堂，考個試，然後就拎完張證書，等自己可以升職加薪？乜讀書唔係為咗增進知識？嘥咁多錢同時間，為嘅係啲乜嘢呢？如果係咁不如唔好讀啦！
港學校
香港嘅教育制度真係玩死啲父母，當然係其他國家都會有類似嘅情況，只不過香港係唔係有啲太過複雜呢？就連幼稚園都已經要搞咁多嘢，真係未做人父母係唔會知道有幾變態。有時唔係你想做怪獸家長，而係不論政府又好，學校又好，都令到好多家長變成怪獸。好多人都會跑出嚟講好多嘢，但係如果唔改變根本嘅問題，其實講乜嘢都無用！
好學校
每個人十隻手指都有長短，所以每個人都有自己嘅長處同短處。係香港每個家長都好緊張自己仔女嘅成績，雖然大家把口就話求學不是求分數，只不過其實好多時咪又係好介意分數。講到尾其實係教育體制嘅問題，因為學生嘅成績係同分數掛鈎。如果真係有學校真係唔係用分數去量度學生嘅成績嘅話，我相信好多學生同家長都會好開心，只不過就算學校唔求分數個教育機制求分數，所以到最後都好似無得揀！