不變的

好多人話經過咁多年,大家只係用同一種方式去爭取,用同一種方法去平反,其實都係冇用。當然方法係可以改變,但係承傳就更加緊要。歷史係用文字去記錄發生咗嘅事同物,等下一代係歷史當中了解人類嘅成與敗。但係當一個國家意圖或企圖篡改歷史,否認歷史,打壓尋求真相嘅人,咁就算國家有幾強大幾發達都好,永遠都會有一個歷史污點,永不磨滅。

忘不了

究竟有幾多年輕人會去悼念六四?佢哋就算去嘅話,其實係唔係為咗趁熱鬧?定係因為朋友或者屋企人話去所以就去?無論係點,新世代應該需要完全了解當年所發生嘅每一件事!用武力去鎮壓手無寸鐵嘅學生,其實同大屠殺係無分別,與此同時大家亦都應該去了解事件嘅始末。其實用乜嘢形式去將六四嘅歷史保存同傳承係一個好重要嘅議題,因為大家唔希望嚟段歷史慢慢咁俾人忘記!

六月四

今日係「六四」嘅第二十六個年頭。「八九」個年我九歲!仲好記得個陣時電視日日都有講嚟事件嘅發展,當然最記得係香港有一百五十萬人一齊上街遊行!雖然以前細個唔識咁多嘢,淨係知道係六月四號嚟一日,有一個冷血無情嘅國家竟然會出動軍隊去血腥鎮壓一班手無吋鐵嘅學生同市民。係二十六年前資訊無依家咁發達,好多事其實都被中國政府封殺咗。