移民潮

香港係八九十年代曾經出現過移民潮,由其經歷咗天安門事件之後,更加多人對回歸後嘅香港擔心。擔心嘅都係自己下一代嘅將來!要去到一個新嘅環境,要適應新嘅生活真係談何容易。當然現今世代好多人都係外國讀書同長大,加上外出旅行比起以前更加容易。所以大家都知道乜嘢地方會適合自己,雖然去旅行同長期居住係嗰個地方好唔同,不過最起碼去過,了解過當地嘅風土人情先啦!

失自由

香港係唔係開始步入「一國一制」嘅年代?所謂嘅五十年不變嘅承諾,而家連一半都未過就已經蕩然無存?因為過去近一年嘅社會風波,因為一個無能嘅特首,搞到依家要中國出手,老實講問題源頭都係因為林鄭!真係多得佢唔少,佢嘅破壞力真係勁過梁振英!香港都真係多得佢唔少,因為而家變咗做夾心餅,淪為世界嘅政治籌碼,何必呢?

質素低

香港係六七十年代警隊貪污嚴重,亦都對政府嘅形象造成沉重打擊。所以香港先至有廉政公署。但係近年警隊嘅質素越嚟越低,唔通我哋又時光倒流,去返六七十年代?究竟係唔係知法犯法?相信每一位香港人心底裏都有一個答案。究竟警察仲係唔係大家可以信任嘅香港人?當然紀律部隊係要遵從命令,只係今時今日佢哋有幾多人真係真心覺得無問題?

寫唔寫

如果有睇到今日特首點樣回應《國安法》嘅話,其實應該都預咗佢會講乜嘢廢話。基本上《基本法》附件三係一個後門,任何時候其實都可以隨時將中國法律加入附件三。咁當然《國安法》所涵蓋嘅範圍實在太廣同太闊,咁究竟自己仲寫唔寫有關自己嘅睇法同政治相關嘅嘢好呢?當然出得文或多或少都會預咗,只不過今次咁強硬,可見佢哋淨係擔心社會運動繼續落去嘅話係會出事。

國安法

因為上年反修例而引起嘅社會風波,直到今日依然未平息。接二連三政府不斷打壓,亦都未有回應市民嘅訴求。與此同時香港回歸咁耐依然未為《基本法》23條立法,但係即將開幕嘅中國全國人民代表大會將審議有關香港「維護國家安全」的議案。據媒體報道,今次加入嘅《國安法》將包括顛覆國家政權,分裂國家,恐怖活動,以及外部勢力干預。