二零一八年又係一個高低起跌嘅一年，慶幸可以係年頭走出低谷。雖然路依然難行，但係最起碼可以輕鬆少少，有透氣嘅空間。不過到咗年尾一切又打回原形，壓力依然有增無減，只係希望每日安然度過。過去一年體力透支，就連寫嘢嘅意欲都大減。好多嘢想寫，好想繼續日日寫文，但係真係無咁嘅心機同心情。作為一年嘅終結，都希望記錄下一個忐忑不安嘅一年。

二零一七應該係我人生入面最差嘅一年！由頭到尾其實都唔知今年做咗啲乜，只係知道每一日都有唔同嘅問題要處理！真係可以話十個煲得一個蓋去形容。本來以為年尾可以好過返少少，點知到最後仍然仲未有啲乜嘢突破！雖然每日都希望用一個正面嘅心態去看待困難同逆境，但係每日得到嘅係無數嘅批評同責備。雖然嚟到今年嘅最後一日，情況依然未有改善，只係希望新嘅一年做返自己！

話咁快又一個月，點解好似啱啱琴日先至寫完回顧今日又寫？或者每日同郭大少返學放學嘅日子就係咁，唔覺唔覺又一日，感覺今個月過得仲快咗。有時見到佢啲古靈精怪嘅樣就會諗起自己細個，真係好似唔似，不過就真係好搞笑。而家成日當自己好大個，樣樣都想自己嚟，但係做唔到又發自己脾氣，真係俾佢激鬼死。老實講，郭大少可唔可以大得慢少少呢？

話咁快又一個月，好似啱啱先至同郭大少慶祝完生日無幾耐。好快佢就開始校園生活，原本以為佢咁癡我哋，點都會有啲分離恐懼症，點知嚟個小朋友竟然完全可以唔理我哋，自己去上堂。咁應該到真正開學嘅時候，相信唔會出現爆喊同難捨難離嘅情況。不過佢真係好鍾意返學嘅小朋友，有次出去食晏，點知佢一出門口就話要返學，但係嗰日係星期日邊度有學返嚟？

今年見到好多人回顧二零一六年都話今年好多嘢都唔係太好。當然我都有同感，因為生活同工作嘅各方面都唔係太如意。點都好，今日係今年嘅最後一日，所以都係要為今年作一個總結。今年年頭搬咗屋，一家人換咗一個新環境，每日大家嘅焦點都係郭大少。今年同郭大少去咗三次旅行，分別去咗沖繩，蘇梅，同九州。而今年大部份嘅時間其實都係放咗係佢度，因為希望可以同佢一齊成長！