五十九

我諗今個月最開心嘅就係迪士尼開返!因為又可以唔駛諗同佢去邊放電。當然依家要預早七日訂位,不過好彩係佢開返嘅第一個星期六已經可以去到。真係整整五個月無去過,而感覺好似第一次去咁見到啲新嘢都會話嚟啲之前無㗎喎!除此之外,今個月真係唔記得去咗幾多次海灘,真係一好天同有時間都會去,因為真係唔知同佢可以做乜。之前諗住佢大個咗可以試過去行街,但係到最後都係搵自己嚟搞。有話攰,又話悶,真係激死!

第十八

邊個話女仔易湊啲㗎?不過女仔就真係有啲脾氣,有時真係唔知道佢扭啲乜嘢。當然依家識行識走,同隻甩繩馬騮無分別。本來以為女仔會定啲,安靜啲,但係真係比起郭大少更加嚴重,真係以為生多咗個仔。話雖如此,佢又唔係嗰啲唔怕陌生人嗰啲,見到唔識嘅都需要啲時間去適應。希望之後返學會好啲,相信唔會好似郭大少咁一支箭咁衝咗入去連回頭望都唔望。

五十八

究竟今年郭大少返咗幾多個月學?我諗都真係一隻手數得晒!對於小朋友嚟講,返學應該係最開心嘅時間,亦都係最寶貴嘅時間。啱啱開學,雖然叫做識咗啲同學仔,只不過斷斷續續咁返下停下,然後直頭整個學期都無得返學見啲朋友。雖然話透過網上可以學習,但係我始終覺得小朋友係需要有社交接觸。當然無人諗過疫情會持續咁耐,而亦都係咁整個幼稚園學年就咁無咗。

第十七

唔覺唔覺又一個月,本來今日應該寫其他嘢先,但係點都係記錄郭小姐嘅成長緊要啲。當然相比起郭大少,佢冇乜話點樣出去上堂,大部份時間都係同我哋一齊,但係睇得出有個頑皮嘅哥哥,好多嘢都係跟著佢做。正所謂好嘅唔學,學晒郭大少啲曳嘢!當然有時真係俾佢哋激死,因為細妹學阿哥,但係阿哥見到個妹做就話佢曳,無限輪迴。其實邊個先至最曳呢?真係大嘅唔好教壞細!

又報銷

有乜嘢慘過無咗部電話?其實每次部電話壞嘅原因都係因為入水,而最擔心嘅都真係無咗入面嘅相。有一次冇咗近一年嘅相,所以超級唔開心,之後真係冇計唯有俾錢將所有嘢擺晒係舊雲上面。真係好怕無晒啲嘢,因為好多回憶係入面。所以備份係好重要,好重要,好重要!真係要講三次,因為啲相無咗就係無咗。而且真係唔好懶同慳嚟啲錢,乜嘢都可以唔見,就係啲相唔可以唔見!