莫議員

今屆嘅立法會選舉真係好緊張,而當然我最關心嘅係莫乃光可唔可以連任。因為之前無啦啦多咗好多選民加入嚟個界別,而且係投票嘅前夕不斷俾人抹黑。當然自己可以做嘅嘢唔係太多,最多都係叫啲人去投票。今次唔單止係捍衛業界,而且為咗香港嘅將來。所以無論如何都唔希望失去一個咁盡責嘅議員係立法會為我哋業界同香港人發聲!

科技界

首先想講講,無啦啦點解科技界會多咗咁多選民?選民登記冊嘅數據顯示,今年嘅選民人數,較二零一五年大幅度上升超過六千名選民。升幅多達一倍,而新增的選民大部份都係個人票嘅選民!老實講我唔知有幾多人會無啦啦走去入所謂嘅協會,之後仲走去登記做功能組別嘅選民。真係有咁多人關心資訊科技界?當然我身邊有好多熱衷嘅人士,但係又有無咁多我真係唔覺!