港學生
係香港，好多小朋友都要面對唔同嘅壓力，尤其係學業嘅壓力！其實過去咁多年，不時都有學生跳樓嘅事件發生，而今年已經發生咗好幾次。點解啲小朋友會去到自尋短見嘅地步呢？小朋友唔係應該開開心心咁生活，無憂無慮咁成長，但係偏偏係香港小朋友嘅壓力就特別大。歸根究底都係因為香港嘅教育制度同社會價值嘅問題。我經常問，究竟教育呢兩個字係點解？教育嘅原意係乜？
講民主
民主就係指每一個人都有自己嘅空間同自由去做任何嘢。好多人雖然對今次嘅美國總統大選感到意外，但係不得不承認嚟個就係一個民主嘅社會，而結果係有大部份嘅美國人都支持特朗普。有啲人會話嚟個就係民主社會嘅漏洞，但係其實嚟個正正係一個防止一權獨大嘅機制所產生嘅結果。就算有幾唔想特朗普做總統都好，而家已經係一個無可改變嘅事實。大家唯一可以做嘅就係希望佢做好以下落嚟嗰四年總統，等下次大選嘅時候再用選票踢佢走。
揀學校
每個父母都想望子成龍，尤其係中國人嘅社會。我從來都無否定過讀書嘅緊要性，雖然自己唔係讀書嘅材料。自問都係高中啲成績先至好返啲，不過最終都係讀咗一年大學之後就無再繼續，直至前幾年先至有個大學學位。我諗如果我係香港讀書嘅話，我相信我亦都係嗰啲一敗塗地嘅學生。當然每個人都有唔同嘅性格同出路，而我亦相信「近朱者赤，近墨者黑」，所以有時唔係淨係希望自己個仔讀間好學校咁簡單，而係佢身邊嘅朋友同環境係更加重要！
開學啦
每年都會係九月一日開學日見到好多人講今日自己仔女返學嘅情況，尤其係啲小朋友啱啱入學。當然時間真係好快，過多一兩年我都相信我會做同一樣嘢。梗係啦，個仔第一次返學喎，當然要記錄在案啦！唔知到時佢係會係喊到傻咗嗰啲，定係興奮嗰啲呢？如果係依家嘅郭大少，我相信會係前者。雖然依家佢去到陌生環境都唔係好怕，只不過如果見唔到我哋而又無相熟嘅人嘅話，佢通常都會喊。
天文台
其實如果天文台話會改掛八號風球，啲人先至鬆人返屋企，其實係唔係已經會有危險嘅呢？老實講如果天文台話未來一兩小時會改掛八號風球，係唔係應該所有人都已經要開始準備返屋企呢？不過如果知道會打大風，其實都無乜生意做㗎啦，倒不如早啲執嘢俾啲員工走人。安全最緊要，更何況今次真係食到正一正！