被轉型

網上因為武漢肺炎大家除咗被創業之外,當然就係被轉型。當然有一部份嘅人因為今次嘅疫情導致無收入,失去工作。係咁嘅市況之下,要搵工都唔係一件易嘅事。當然有啲公司係逆市請人,因為好多人才流入市場,係一個唔錯嘅時機請人。但係亦都有一部份嘅人就要急急轉型,因為就算疫情過去之後都未必有嘢做。有危便有機,好多人只係過唔到自己嘅安全網而已。

早轉型

公司要轉型其實唔係一件易事,因為通常都會有好多歷史遺留落嚟嘅問題要去面對同解決。如果係一間百年老店就更加難,因為最難處理嘅員工嘅心態。有啲人會覺得係危機,有啲人就會覺得係機遇,所以好視乎員工點樣睇每一次嘅改革同轉型。當然無人可以咁寫包單一定會成功,只不過如果係士氣高昂嘅時候轉型,成功率一定大過士氣低迷嘅時候。

數據戰

每間公司最值錢嘅資產其實係數據,所以大家都希望建立自己嘅數據平台,但係如果只有自己公司嘅數據,好多時就無辦法突破框架。因此好多時唔同公司都會將某部份嘅數據互相分享同連結起嚟,希望係分析數據嘅時候可以更加全面。收集數據只係一個開始,因為無數據同方程式就無可能自動化,而無自動化就無得令程式自學起嚟,而無自學嘅話就唔會有人工智能!

超離譜

雖然航空公司超賣係好常見亦都好普遍,而且超賣亦都係合法,航空公司亦有權利去取消客戶嘅機位。只不過合法還合法,真金白銀嘅消費者又有啲乜嘢權利同保障?航空公司為咗保護自己嘅利益而要超賣,不過好多時嚟種營商嘅模式都會被質疑有無道德!有時真係唔係錢唔錢嘅問題,因為有好多人都真係有需要係特定嘅時間去到其他地方。如果因為航空公司嘅利益,真係講唔過去。其實係唔係應該修改法例同保障消費者呢?

好網站


個人分享
Tagged With: , , , , , , , , ,

諗返二十幾年前自己開始學寫網站嘅時候,當然就無諗過依家嘅網站可以寫到出神入化。以前細個邊度識咁多嘢呀,點樣登記域名,點樣起個伺服器,等等嘅嘢都係邊玩邊學。就算網站本身都要用人手逐行逐行咁寫出嚟,邊似得依家咁方便同咁講究。當然依家嘅網站用途有好多,但係如果要稱得上一個好網站,老實講真係買少見少。不過如果仲有人覺得一個網站對一間公司無用嘅話,咁就真係認真大鑊,因為如果連一個網站都無,要人搵到你都真係會有難度。