廿九個

究竟郭大少返學係點嘅呢?今個月係人生第一次去家長會,其實都估到一二,不過見到佢係學校好開心就已經足夠。雖然香港嘅教育真係幾變態,因為佢始終都係一個兩歲人仔,見到佢一日一日長大就得啦!不過兩歲嘅人仔真係茶煲,經常性同你唱反調,又堅持樣樣嘢都要自己做,唔啱心水又發脾氣,但係又真係正常,因為每個小朋友都會經歷呢個階段,只係我哋真係俾佢激死!

搞派對

每個小朋友都會搞過生日會,而我哋上年無幫郭大少搞,只係叫咗屋企人同佢哋一齊慶祝。今年我就想幫佢搞返個生日會,等佢開心下。因為郭大少好鍾意巧虎,整個生日會嘅主題都係用巧虎為主。而老婆真係好厲害,因為佢訂咗好多巧虎嘅佈置同生日蛋糕俾郭大少!如果你問我真係唔知係邊度可以搵到咁多巧虎嘢返嚟。有時不得不佩服淘寶嘅強大之處!