被騎劫

好地地嘅一個網上直播嘅演唱會,無啦啦走出嚟係社交平台出篇文,搞到好似同佢有關咁,仲要出埋相拉關係。其實真係可唔可以唔好騎劫人哋做嘅嘢呢?人哋出嚟搞個免費演唱會其實係為咗一班失業嘅通利琴行員工人去籌款。作為一個特首究竟做咗啲乜?老實講除咗自己本來加人工,唔被踢爆都唔出嚟話將自己份糧拎出嚟之外,講真香港人靠你真係死得!

倒模式


個人分享
Tagged With: , , , , , , , , ,

每個人嘅價值觀都好唔同,而往往好多人都將自己嘅觀點與角度擺咗落去自己嘅下一代。當然好多嘢我哋都希望可以薪火相傳,只不過時代會變,而我哋亦都應該要變。雖然有時係唔明白年輕人嘅諗法,但係佢哋係社會下一代嘅主人翁,所以有時無必要倒模式咁將我哋認為啱與唔啱嘅嘢灌輸俾佢哋。保護下一代係我哋嘅責任,但係過份保護,過份規管,就好大機會有反彈嘅情況。

超現實

之前都有討論過人生價值觀嚟個問題,老實講有時自己都覺得慢慢被香港嘅環境侵蝕,就好似以前係中國做嘢咁,慢慢變得內地化。當然每個人都有唔同嘅價值觀,你以為自己無變,但係其實係不自覺咁變緊。只不過因為慢慢咁逐少逐少改變,所以自己唔係好察覺。正所謂近朱者赤,近墨者黑,慢慢就會被同化。人要生存係一個好現實嘅問題,而係香港真係窮得剩低「錢」嚟個價值觀!

換頭像

每個人嘅價值觀都有唔同!乜嘢叫做廉價表態,乜表態有分貴定平?我真係唔知,因為對我嚟講表態係對一啲事同物嘅睇法。咁點為之廉價?我出文章係記錄自己今日嘅念法,對我嚟講係無價!正所謂不喜勿入,你可以選擇去睇同唔睇。有時大家都只係想多啲人知道同關注事件,可必要用價值去評論事件呢?希望大家唔好只係為咗自己嘅睇法唔同而去否定別人嘅價值觀!事關大家都係嚟個社會嘅人,大家都係平等!

講歪理

近排越嚟越聽得多一啲以為自己講緊道理嘅歪理。係呢個世界變咗?定係我哋老咗唔明依家個世界嘅人諗乜?點解有啲人覺得自己講嘅嘢係大道理,仲要聲大夾惡,以為自己好啱,但係其實係一大堆歪理!真係抓爆頭,點解啲後生可以咁理直氣壯講一啲好似好啱嘅理論?定係價值觀唔同咗?有時聽到真係覺得好好笑,同時真係想鬧爆佢哋!