又亂嚟

相信大家仲記得去年美國總統選舉嘅時候,好多唔同嘅媒體都會用唔同嘅數據嚟做分析。點知全部都錯晒!而最近亦見到有本地公司話用「大數據」去分析特首參選人相關嘅帖文及留言,睇下究竟啲網民支持邊個同講啲乜嘢比較多。雖然見到有人嘗試利用數據去做選舉嘅分析,但係睇完佢哋所採用嘅數據之後,發現佢哋有同一個問題就係數據來自社交媒體,同時所涵蓋嘅範圍亦都比較窄!

不連任

過去四年香港真係變咗好多,由四年前嘅特首選舉開始就已經知道依家個位特首唔慌係好嘢,當然時間證明咗佢做特首有幾大鑊。老實講真係每次鑊鑊新鮮鑊鑊金,越搞越大單嘢。好啦終於捱到佢嘅任期屆滿,出年就係特首選舉,今個星期就係選委會選舉,而好多政團都以踢走梁振英為政綱,因為如果佢再做多四年香港真係無法想像會變成點!當然最近有好多疑似參選人話有機會出嚟參選,但係到嚟一刻都仲未宣佈。所以究竟邊個會係下一個香港特首真係好難估!

真黑暗

老實講今次嘅立法會選舉,除咗功能組別我好清楚知道點樣投票之外,其實因為啱啱由港島東搬咗去新界西之後,基本上都唔知應該點樣投。不過我好肯定嘅係點都唔會投俾所謂嘅獨立侯選人,因為話獨立其實就最唔獨立。所以到最後點都唔會揀佢哋,而當然所有建制派嘅都唔會係我嘅選擇。有時真係有諗過投俾我哋嘅下一代,最起碼佢哋有團火,試圖改變現狀!

科技界

首先想講講,無啦啦點解科技界會多咗咁多選民?選民登記冊嘅數據顯示,今年嘅選民人數,較二零一五年大幅度上升超過六千名選民。升幅多達一倍,而新增的選民大部份都係個人票嘅選民!老實講我唔知有幾多人會無啦啦走去入所謂嘅協會,之後仲走去登記做功能組別嘅選民。真係有咁多人關心資訊科技界?當然我身邊有好多熱衷嘅人士,但係又有無咁多我真係唔覺!

選管會

香港擁有嘅民主自由真係慢慢被侵蝕,而今年嘅立法會選舉就更加明顯。自從之前嘅區議會選舉之後,好多人都會認為係立法會選舉嘅前哨戰。所以當出現咁多嘅不明朗因素,今次嘅立法會選舉政府當然會有所舉動。當然好多官員都會提及本土或者港獨等等嘅言論,其實每個地方都有唔同聲音,而咁高調批評反對聲音就好明顯想壓制個班人!