人到咗某啲年紀就要經歷生離死別，雖然明白嚟個道理，人總會離開呢個世界。當然人老去係自然定律，不過當你身邊有相約年紀嘅朋友離開嘅時候，自自然然又會反思究竟人其實係幾咁脆弱。係唔係真係去到失去先至去回憶，去珍惜係自己人生出現過嘅每一個人。係唔係將所有嘢變得太過理所當然？相信大家總有機會再見，相信人生仍然有大把時間，但係到最後其實再無咁嘅機會。淨落嚟嘅只係腦入面嘅回憶同畫面。

十年前決定放棄高薪厚職，開始籌備自己公司，用六個月一邊返工一邊準備，希望用十年做自己想做嘅嘢。十年後嘅今日，覺得十年原來比想像中快，快到自己都唔知做咗啲乜，甚至乎覺得比起十年前更加倒退。近嚟五年嘅轉變就更加大，尤其係郭大少出世之後。如果再比我揀過會唔會揀同一條路？十年期限到了，下一步究竟係點？其實近年嘅問題不斷重複，真係有啲攰。放棄，堅持依然係一大個問號。

人越大就好似越少影相，我自己係單人照。要搵舊相都比較容易因為細個都會俾人影。就算而家有部手機，自拍雖然方便，但係我諗男仔就真係好少自拍。自己鍾意影風景，影小朋友，依家就連相機都好少用，因為手機真係實在太過方便。雖然同相機有好大出入，不過同小朋友出街真係好難下下帶部相機出去。當然睇返相有好多回憶，甚至乎有時睇番都覺得幾好笑。然後會問點解嗰陣時會影張咁嘅相。

諗咗好耐，究竟好唔好開島呢？因為真係好多嘢做，但係一個二個都玩，最後都係決定開島。最終都係敵不過社交媒體嘅洗版。不過問題係究竟大家會玩幾耐呢？因為我玩遊戲都玩到好盡，一定要玩到冇嘢玩我先至會叫做玩完。所以一啲要長時間上網同浪費時間嘅遊戲我都好少玩。最後就快嚟快去，因為真係無咁多時間。當然希望大家唔好因為淨係疫情先至玩，不過香港就係咁，一係唔玩，一係就一窩蜂咁玩。

不經不覺已經離開咗大公司十年。究竟自己用咗十年做咗啲乜？如果問心當然理想與現實不相符。有無浪費咗十年？其實又真係好難去量度。十年入面有無成長？或多或少都有啲，當然相比之下的確問慢咗好多！其實過去十年每年都總係有啲嘢發生，忙忙碌碌咁又過一年。自己俾自己嘅期限亦都所剩無幾，雖然人生好難計算，只係又到咗人生交叉點嘅時候。