棍波車

有啲人一聽到棍波車就已經耍手擰頭,原因係覺得揸車已經夠多嘢去兼顧,重要顧及過離合器去轉波。而每當塞車嘅時候又覺得好麻煩,所以好多人就算識揸棍波車都唔會選擇去揸。當然揸車應該係一種享受,而唔係一種折磨。當然現今嘅科技發達,自動波箱越來越先進,只不過就去越多電子嘢就越容易壞。有某啲品牌嘅自動波箱出咗名易壞,買車就好似買大細咁,好彩嘅到你賣嘅時候都唔會壞,唔好彩嘅就經常壞!

零到一

零係所有嘢嘅開始,亦都係所有嘢嘅終結。每個人出世嘅時候都係乜嘢都無,就算你用一世嘅時間去建立所有你覺得有價值同意義嘅嘢,但係到最後辛辛苦苦所建立嘅一切都隨著人生嘅終結而消失。當然好多人會希望自己嘅一生唔會係零,但係到最後就算唔係零亦都唔會係一。人生係充滿矛盾,因為大家都窮一生嘅精力去生存,希望可以改變世界,但係有一樣嘢係改變唔到嘅就係人生!

三週年

三年前嘅今日,我哋由兩個陌生人變成夫妻。眨下眼又一年,而過去一年大家嘅重心都放咗係郭大少嘅身上,二人世界嘅時間變得越來越小。當然無諗過一個小朋友會帶嚟嘅改變係咁大!莫講話可以安安靜靜咁坐低食餐飯,就連可以傾計嘅時間都好少,事關忙完一日大家都已經筋疲力竭。所以而家可以兩個人一齊去享受下都真係一件幾難能可貴嘅事。

放完假


個人分享
Tagged With: , , , , , , , , ,

今次嘅假期我諗最興奮嘅係郭大少,因為佢一見到間酒店房個泳池就已經想衝落去游水。今次間酒店房其實都幾大,所以佢基本上可以好開心咁周圍爬,而最近佢好想自己行,所以佢要我哋拖住佢圍住間房不斷行。唔知係唔係心理作用,我同老婆都覺得每次佢去完旅行都好似長大咗。好啦放完假又要回歸現實,因為之後有排忙,真係放完假好似無放假咁。

飲咖啡

「咖啡」

飲咖啡係唔係就代表你係中產,講真見仁見智啦,不過飲咖啡係有咖啡嘅文化,而唔係是是但但搵一間連鎖咖啡店就得!係香港其實要搵一間好嘅咖啡室真係有啲難,有時真係要專程去嗰間舖頭就係為咗一杯咖啡。係外國其實係一種享受,尤其天朗氣清嘅時候,因為可以一邊做嘢,一邊飲咖啡,一邊享受陽光。而好多時唔洗特登搵咖啡室,因為如果唔好飲嘅話基本上一定無人幫襯!