上太空

1969年7月21日,係人類第一次登陸月球,而岩士唐成為第一位人類踏足月球。「個人一小步,人類一大步」,人類嘅太空競賽直至今時今日都未停過。而今日亦都因為 SpaceX ,而成為第一間企業成功將人類安全送上太空。當然最重要嘅就係同國際太空站對接,與此同時亦都要安全咁將兩名太空人成功咁送返地球。不過最起碼已經成功咗一半!

移民潮

香港係八九十年代曾經出現過移民潮,由其經歷咗天安門事件之後,更加多人對回歸後嘅香港擔心。擔心嘅都係自己下一代嘅將來!要去到一個新嘅環境,要適應新嘅生活真係談何容易。當然現今世代好多人都係外國讀書同長大,加上外出旅行比起以前更加容易。所以大家都知道乜嘢地方會適合自己,雖然去旅行同長期居住係嗰個地方好唔同,不過最起碼去過,了解過當地嘅風土人情先啦!

失自由

香港係唔係開始步入「一國一制」嘅年代?所謂嘅五十年不變嘅承諾,而家連一半都未過就已經蕩然無存?因為過去近一年嘅社會風波,因為一個無能嘅特首,搞到依家要中國出手,老實講問題源頭都係因為林鄭!真係多得佢唔少,佢嘅破壞力真係勁過梁振英!香港都真係多得佢唔少,因為而家變咗做夾心餅,淪為世界嘅政治籌碼,何必呢?

當入樽

唔知有幾多人睇過「男兒當入樽」?應該咁講,而家仲有幾多後生仔女依然睇漫畫?我哋成長嘅年代,基本上係漫畫不離手嘅年代。當然而家可以上網睇或者用手機程式睇又得,只不過同拎住一本實實在在嘅漫畫嘅感覺係好唔同。而中學時期大部份人都會打籃球,而「男兒當入樽」就好自然成為大家追捧嘅漫畫之一。當然仲有動漫啦!記得試過一口氣由頭到尾一次過睇晒成套動畫!

五十八

究竟今年郭大少返咗幾多個月學?我諗都真係一隻手數得晒!對於小朋友嚟講,返學應該係最開心嘅時間,亦都係最寶貴嘅時間。啱啱開學,雖然叫做識咗啲同學仔,只不過斷斷續續咁返下停下,然後直頭整個學期都無得返學見啲朋友。雖然話透過網上可以學習,但係我始終覺得小朋友係需要有社交接觸。當然無人諗過疫情會持續咁耐,而亦都係咁整個幼稚園學年就咁無咗。