等等等
其實我係一個好心急嘅人，最憎嘅就係等。如非必要真係唔好叫我排隊，就算係排都係一啲特別嘅原因。當然有人會話等待係耐性嘅一種，但係如果等待嘅回報唔係成正比嘅話，咁其實就係浪費時間。當然有時等到最後係得個吉，但係有時都真係無嘢可以做到，所以只可以等。當然有啲嘢係要堅持，而堅持係等待嘅一種。今年好多嘢都係身不由己，好多嘢都只可以等！
被遺忘
其實好多時好多嘢都係被遺忘，正確啲講係因為生活同時間導致被遺忘。就算幾大件事都好，每個人都會因為生活而忘記咗某啲事同物。雖然係嗰一刻嚟講係好緊要，但係慢慢經過時間洗禮，每日忙碌嘅生活，好多時不經不覺就已經忘記咗。只不過當有一日再遇到某啲事同物，嚟啲記憶又會再一次被勾起，只不過再重唔重要？當然無一個絕對嘅答案，因為每個人都唔同！
電話咭
相信依家好多人去旅行都唔可以唔上網，但係應該唔會有人會俾得起咁昂貴嘅漫遊數據費，所以通常都會租一隻蛋去旅行方便上網。只不過有時幾個人去旅行，如果得一隻蛋嘅話，只要離開咗個接收範圍，基本上就無辦法上網。因此好多人而家就會預先買定一啲數據電話卡，但係啲電話卡真係五花八門，花多眼亂。究竟點樣揀都真係需要小小時間去了解。
廿六個
過下一個月，過下又一個月，郭大少又成長咗唔少。當然返咗學之後係有啲改變，最大嘅改變一定係多咗嘢講，唱多咗歌。有時真係估佢唔到，老師話佢唱歌唱到連隔離班嘅班主任都問究竟邊個唱歌唱到咁大聲。但係唔知係唔係因為突然之間要返三個鐘頭學，覺得佢比較攰同埋只係得我一個佢，所以有幾日我送佢返學竟然扭計唔肯入去學校。好彩之後都回覆正常！
讀書為
今年真係不斷教書，但係有時真係遇到一啲好奇怪嘅學生。有時心諗其實佢哋究竟點解返學？當然好多人都會選擇去繼續進修，而好多時都係要真金白銀咁俾錢去讀。既然俾咗錢咁點解又唔認真咁去讀呢？唔通真係諗住隨隨便便上完堂，考個試，然後就拎完張證書，等自己可以升職加薪？乜讀書唔係為咗增進知識？嘥咁多錢同時間，為嘅係啲乜嘢呢？如果係咁不如唔好讀啦！